ఆంధ్రభారతి - తాళ్లపాక అన్నమాచార్య కీర్తనలు - ఒడఁబరుచుకొంటివి వుపేంద్ర నిన్ను నిపుడె - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 145-2
సంపుటము: 2-201

తాళ్లపాక అన్నమాచార్య

రాగము: గౌళ

ఒడఁబరుచుకొంటివి వుపేంద్ర నిన్ను నిపుడె చిడిముడి నీసేవకే సెలవు చేసుకొమ్మీ	॥పల్లవి॥
కన్నుల నేఁ జూచేదెల్లా కమలాక్ష నీపాదాలే విన్నవినుకులెల్లా విష్ణుఁడ నీకథలే తిన్నని నామాటలెల్లా త్రివిక్రమ నీమంత్రాలే అన్నిటా నాభావము సమర్పణము నీకును	॥ఒడఁ॥
అట్టె నే నడచేవెల్లా హరి నీప్రదక్షిణాలే గుట్టున నాసేఁతలెల్లా గోవింద నీకైంకర్యాలే ముట్టి నేభజించినవి ముకుంద నీప్రసాదాలే నెట్టన నాభోగమెల్లా నీవసము చేసితి	॥ఒడఁ॥
యిల నేఁ బండఁబడేవి యీశ్వర నీకు మొక్కులే తలఁచే నాతలఁపెల్లా దామోదర నీధ్యానమె నలువంక శ్రీవేంకటనాయక నీయనుజ్ఞను నెలవై నాభవములెల్లా నీసొమ్ము చేసితి	॥ఒడఁ॥