ఆంధ్రభారతి - తాళ్లపాక అన్నమాచార్య కీర్తనలు - అందరిలోనా నెక్కుడు హనుమంతుఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 146-2
సంపుటము: 2-207

తాళ్లపాక అన్నమాచార్య

రాగము: నాట

అందరిలోనా నెక్కుడు హనుమంతుఁడు కందువ మతంగగిరికాడి హనుమంతుఁడు	॥పల్లవి॥
కనకకుండలాలతో కౌపీనముతోడ జనియించినాఁడు యీ హనుమంతుఁడు ఘన ప్రతాపముతోడ కఠినహస్తాలతోడ పెనుతోఁక యెత్తినాఁడు పెద్ద హనుమంతుఁడు	॥అంద॥
తివిరి జలధి దాఁటి దీపించి లంకయెల్లా అవల యివల సేసె హనుమంతుఁడు వివరించి సీతకు విశ్వరూపము చూపుతా ధ్రువమండలము మోచె దొడ్డ హనుమంతుఁడు	॥అంద॥
తిరమైన మహిమతో దివ్యతేజముతోడ అరసి దాసులఁ గాచీ హనుమంతుఁడు పరగ శ్రీవేంకటేశు బంటై సేవింపుచు వరములిచ్చీఁ బొడవాటి హనుమంతుఁడు	॥అంద॥