ఆంధ్రభారతి - తాళ్లపాక అన్నమాచార్య కీర్తనలు - ఇదియే కావలెనని తాఁ గైకొని యిచ్చగించువాఁడే ఘనుఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 146-4
సంపుటము: 2-209

తాళ్లపాక అన్నమాచార్య

రాగము: శ్రీరాగం

ఇదియే కావలెనని తాఁ గైకొని యిచ్చగించువాఁడే ఘనుఁడు వదలకురో హరిదాసుల మతమిది వర్ణించెద నో వివేకులాలా	॥పల్లవి॥
దేవుఁడు గలఁడని మదిలోఁ దెలియుటే జన్మఫలంబు తావుగ నాతని నెప్పుడుఁ దలఁచుటే తనభాగ్యము శ్రీవైష్ణవధర్మము దప్పక చెలఁగుటయే వైభవము దేవతాంతరంబులన్నియు మానినదియే సుకృతంబు	॥ఇది॥
కామక్రోధము లుజ్జగించుటయే కల్యాణానుభవము చేముంచి పాపము సేయక మానుటే చెప్పఁగ లాభము నేమముతోడుత విరక్తుఁడగుటే నిర్మలానందము వేమరు నాచార్యసేవ సేయుటే విచారింపఁగ దాఁచిన ధనము	॥ఇది॥
ప్రకృతివికారములకుఁ జొరకుండుటే పరమమైన సాత్వికము సకలబంధములఁ బెడఁ బాసినదే సామ్రాజ్యపదము ప్రకటింపఁగ నలమేలుమంగకును పతియగు శ్రీవేంకటవిభుని అకలంకుఁడై కొలిచియుండుటే యనంతమహిమాతిశయంబు	॥ఇది॥