ఆంధ్రభారతి - తాళ్లపాక అన్నమాచార్య కీర్తనలు - మహి నుద్యోగి గావలె మనుజుఁడైనవాఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 147-2
సంపుటము: 2-212

తాళ్లపాక అన్నమాచార్య

రాగము: వరాళి

మహి నుద్యోగి గావలె మనుజుఁడైనవాఁడు సహజివలె నుండేమీ సాధింపలేఁడు	॥పల్లవి॥
వెదకి తలచుకొంటే విష్ణుఁడు గానవచ్చు చెదరి మఱచితే సృష్టి చీఁకటౌ పొదలి నడచితేను భూమెల్లా మెట్టి రావచ్చు నిదిరించితేఁ గాలము నిమిషమై తోఁచు	॥మహి॥
వేడుకతోఁ జదివితే వేదశాస్త్రసంపన్నుఁడౌ జాడతో నూరకుండితే జడుఁడౌను వోడక తపసియైతే వున్నతోన్నతుఁడౌ కూడక సోమరియైతే గుణహీనుఁడౌను	॥మహి॥
మురహరుఁ గొలిచితే మోక్షము సాధించవచ్చు వెరవెఱఁగకుండితే వీరిడియౌను శరణంటే శ్రీవేంకటేశ్వరుఁడు రక్షించును పరగ సంశయించితే పాషండుఁడౌను	॥మహి॥