ఆంధ్రభారతి - తాళ్లపాక అన్నమాచార్య కీర్తనలు - పరమాత్ముఁడు సర్వపరిపూర్ణుఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 150-4
సంపుటము: 2-232

తాళ్లపాక అన్నమాచార్య

రాగము: భైరవి

పరమాత్ముఁడు సర్వపరిపూర్ణుఁడు సురలకు నరులకు చోటయి యున్నాఁడు	॥పల్లవి॥
కన్నులఁ గంటానే కడు మాటలాడుతానే తన్నుఁగానివానివలె దాఁగియున్నాఁడు అన్నియు వింటానే అట్టే వాసన గొంటానే వన్నెలనూనె కుంచమువలె నున్నాడు	॥పర॥
తనువులు మోచియు తలఁపులు దెలిసియు యెనసియు నెనయక యిట్లున్నాఁడు చెనకి మాయకు మాయై జీవునికి జీవమై మొనసి పూసలదారమువలె నున్నాఁడు	॥పర॥
వేవేలు విధములై విశ్వమెల్లా నొకటై పూవులు వాసనవలె బొంచియున్నాఁడు భావించ నిరాకారమై పట్టితే సాకారమై శ్రీవేంకటాద్రిమీఁద శ్రీపతై యున్నాఁడు	॥పర॥