ఆంధ్రభారతి - తాళ్లపాక అన్నమాచార్య కీర్తనలు - ఎంచి చూడరో ఘనులార యిందీవరాక్షుఁడు రక్షకుఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 151-1
సంపుటము: 2-235

తాళ్లపాక అన్నమాచార్య

రాగము: దేసాక్షి

ఎంచి చూడరో ఘనులార యిందీవరాక్షుఁడు రక్షకుఁడు సంచితముగ నితని శరణంటే సర్వఫలప్రద మిందరికి	॥పల్లవి॥
హరిఁ గొలువని కొలువులు మఱి యడవిఁగాసిన వెన్నెలలు గరిమల నచ్చుతు వినని కథలు భువి గజస్నానములు పరమాత్మునికిఁ గాని తపంబులు పాతాళముల నిధానములు మరుగురునికిఁ గాని పూవులపూజలు మగఁడులేని సింగారములు	॥ఎంచి॥
వైకుంఠుని నుతియించని వినుతులు వననిధిఁ గురిసిన వానలు ఆ కమలోదరుఁ గోరనికోరికె లందని మానిఫలంబులు శ్రీకాంతునిపైఁ జేయని భక్తులు చెంబుమీఁది కనకపుఁబూఁత దాకొని విష్ణుని తెలియని తెలువులు తగ నేటినడిమి పైరులు	॥ఎంచి॥
వావిరిఁ గేశవునొల్లని బదుకులు వరతఁ గలపు చింతపండు గోవిందుని కటు మొక్కని మొక్కులు గోడలేని పెనుచిత్రములు భావించి మాధవుపై లేనితలఁపులు పలు మేఘముల వికారములు శ్రీవేంకటపతికరుణ గలిగితే జీవుల కివియే వినోదములు	॥ఎంచి॥