ఆంధ్రభారతి - తాళ్లపాక అన్నమాచార్య కీర్తనలు - మాయ కిదె సహజము మాయను గెలువరాదు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 152-1
సంపుటము: 2-240

తాళ్లపాక అన్నమాచార్య

రాగము: శుద్ధవసంతం

మాయ కిదె సహజము మాయను గెలువరాదు మాయానాథుఁ గొలిచితే మన్నించు నాతఁడే	॥పల్లవి॥
చేతికి లోనైనట్టుండు సృష్టిలోని వేడుకలు పోతరించి పట్టఁబోతేఁ బోవు నట్టటే ఆతుమలో వేసరి అలసి వూరకుండితే వైతాళపు నీడవలె వచ్చు వెంటవెంటను	॥మాయ॥
తీపువలెనే వుండు దిష్టపుఁ బదార్థాలు మేపుగొంటే మీసాలమీఁది తేనౌను యేపున నాస విడిచి యేరుపడి వుంటేను మూపునఁ గట్టిన చద్దై మోఁపించును	॥మాయ॥
తలఁపులోనే వుండు తనలోని యంతరాత్మ తెలుపుకోఁబోతే పెక్కుదేవతలౌను చలపట్టి యీతనినే శరణని కొలిచితే యెలమి శ్రీవేంకటేశుఁ డీతఁడై రక్షించును	॥మాయ॥