ఆంధ్రభారతి - తాళ్లపాక అన్నమాచార్య కీర్తనలు - దేవుఁడొక్కఁడే గురి దెలిసినవారికి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 152-2
సంపుటము: 2-241

తాళ్లపాక అన్నమాచార్య

రాగము: మంగళకౌశిక

దేవుఁడొక్కఁడే గురి దెలిసినవారికి యీవలావల చూచినా నిఁకలేదు తెఱఁగు	॥పల్లవి॥
కోపము మానితేనే కోటిజపాలు సేయుట పాపము సేయకుంటేనే బలుతపము లోపల తానూరకుంటే లోకమెల్లాఁ జరించుట మాపుదాఁకా వెదకినా మఱిలేదు తెఱఁగు	॥దేవుఁ॥
పరకాంత నంటకుంటె బలుపుణ్యాలు సేయుట సొరిది నాసమానుటే సోమపానము సరిమోనాన నుండుటే సన్యాసము చేకొనుట యిరవైతే నంతకంటే నిఁకలేదు తెఱఁగు	॥దేవుఁ॥
పలు సుఖదుఃఖములఁ బాసి వుండుటే మోక్షము అల చంచలము మానుటది యోగము యిలపై శ్రీవేంకటేశుఁ డిచ్చిన సుజ్ఞానమిది యెలమి బుద్ధిఁ బోల నిఁకలేదు తెఱఁగు	॥దేవుఁ॥