ఆంధ్రభారతి - తాళ్లపాక అన్నమాచార్య కీర్తనలు - విఱిగి పారెడియట్టి వీరిడి యో రిపులాల - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 152-6
సంపుటము: 2-245

తాళ్లపాక అన్నమాచార్య

రాగము: నాట

విఱిగి పారెడియట్టి వీరిడి యో రిపులాల తఱి శరణు చొరరో దండాలు వెట్టరో	॥పల్లవి॥
వీఁడె వచ్చెఁ గృష్ణుఁడిదె వేయరో కైదువులు కాఁగినపోట్లు రాఁగీ కదియకురో పోఁడిమితో భీతివాయ పూరి నోళ్లఁ గరవరో ఆఁడువార మనుకోరో ఆతఁడు దడవఁడు	॥విఱి॥
గోవిందుఁడు దాడివచ్చె గునుకుచుఁ బారరో కావు మని మెడలఁ బాగలు వేయరో వేవేగ బిడ్డలఁ బేర్లు విభునికిఁ బెట్టరో వో వో యెంగిలికిఁ జేతు లొగ్గరో రక్షించీని	॥విఱి॥
మొత్తీ శ్రీవేంకటేశుఁడు మూలలకు దాఁగరో వొత్తిలి పంతములిచ్చి మీ రోడఁగదరో హత్తి మీతలలు విరియఁగఁ బోసుకొనరో బొత్తుగా మిమ్ము గెలిచెఁ బొగడరో మెచ్చీని	॥విఱి॥