ఆంధ్రభారతి - తాళ్లపాక అన్నమాచార్య కీర్తనలు - పురుషుండని శ్రుతి వొగడీనట ఆ పురుషుఁడు నిరాకారమట - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 154-1
సంపుటము: 2-252

తాళ్లపాక అన్నమాచార్య

రాగము: బౌళి

పురుషుండని శ్రుతి వొగడీనట ఆ పురుషుఁడు నిరాకారమట విరసవాక్యము లొండొంటికి నివి వింటే నసంబద్ధములు	॥పల్లవి॥
మొగమున బ్రహ్మలు మొలచిరట ఆ మూరితి అవయవరహితుఁడట తగు బాహువులను రాజులట ఆ తత్వమే యెంచఁగ శూన్యమట పగటున తొడలను వైశ్యులట ఆ బ్రహ్మము దేహము బయలట అగపడి పాదాల శూద్రులట ఆతని రూపము లేదట	॥పురు॥
తన వందనమునుఁ గలదట దైవము తనుఁ జూడఁ గన్నులు లేవట తన విన్నపమునుఁ జేయునట ఆతనికిని వీనులు లేవట తన యిచ్చినదే నైవేద్యంబట దైవము నోరే లేదట తన యిచ్చేటి ధూపంబును గలదట దైవము ముక్కును లేదట	॥పురు॥
అంతాఁ దానే దైవమటా యజ్ఞము లొరులకుఁ జేయుటట సంతతమునుఁ దా స్వతంత్రుఁడటా జపముల వరముల చేకొంటట చింతింపఁ దానే యోగియటా చేరువ మోక్షము లేదట పంతపు శ్రీవేంకటపతిమాయలు పచారించిన వివియట	॥పురు॥