ఆంధ్రభారతి - తాళ్లపాక అన్నమాచార్య కీర్తనలు - ఎంత సోదించి చూచినా యెన్నెన్ని చదివినా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 155-6
సంపుటము: 2-262

తాళ్లపాక అన్నమాచార్య

రాగము: దేసాక్షి

ఎంత సోదించి చూచినా యెన్నెన్ని చదివినా వింతలై న నీమూర్తి వెసఁ దెలిసేమా	॥పల్లవి॥
లోకములో సముద్రములోఁతు చెప్పఁగరాదట ఆకాశ మింతంతని యనరాదట మేకొని భూరేణువులు మితి వెట్టఁగరాదట శ్రీకాంతుఁడ నీమహిమ చెప్ప చూపవశమా	॥ఎంత॥
అల గాలి దెచ్చి ముడియగాఁ గట్టఁగరాదట వెలయఁ గాలము గంటు వేయరాదట కలయ నలుదిక్కులకడ గానఁగరాదట జలజాక్ష నీరూపు తలపోయఁగలనా	॥ఎంత॥
కేవలమైన నీమాయ గెలువనేరాదట భావించి మనఁసు జక్కఁ బట్టరాదట దేవ యలమేల్మంగపతివి నీశరణే గతి శ్రీవేంకటేశ నిన్నుఁ జేరి కొల్వవశమా	॥ఎంత॥