అధ్యాత్మ సంకీర్తన
రేకు: 156-2
సంపుటము: 2-264
రేకు: 156-2
సంపుటము: 2-264
తాళ్లపాక అన్నమాచార్య
రాగము: గౌళ
| నమ్మవలెఁగాని యెన్నఁడు సందేహము లేక యిమ్ముల దేవుఁడు వరమిచ్చు టేమరుదు | ॥పల్లవి॥ |
| మగనిపై బత్తిసేసి మంచిలోకా లెక్కేరట తగుదండకోల వట్టి తత్త్వగతి గనేరట పగటున నొకవేరు వట్టి పాముఁ బట్టేరట తగిలి హరిదాసులు ధన్యు లౌ టేమరుదు | ॥నమ్మ॥ |
| యేలికెకు ధనమిచ్చి హితభోగా లందేరట కేలఁ గత్తివూని పగ గెల్చేరట గాలి లోలోఁ బూరించి ఘనసిద్ధు లయ్యేరట యేలీల హరిదాసులు యీడేరు టేమరుదు | ॥నమ్మ॥ |
| దిక్కుల యజ్ఞాలు చేసి దివిజు లయ్యేరట మొక్కి విప్రుల నర్చించి ముంచి సిరు లందేరట పక్కన నలమేల్మంగపతి శ్రీవేంకటేశ్వరుఁ జక్కనఁ గొల్చిన దాసులు జ్ఞాను లౌ టేమరుదు | ॥నమ్మ॥ |