ఆంధ్రభారతి - తాళ్లపాక అన్నమాచార్య కీర్తనలు - చంచలపడఁగవద్దు సారె సారెఁ గోరవద్దు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 159-1
సంపుటము: 2-281

తాళ్లపాక అన్నమాచార్య

రాగము: పాడి

చంచలపడఁగవద్దు సారె సారెఁ గోరవద్దు పొంచుకున్న దైవమే బుద్ధులు నేర్పీని	॥పల్లవి॥
లోకరక్షకుఁడు నాలోననే వున్నాఁడిదే నాకు నభయములిచ్చి నన్నుఁ గాచును శ్రీకాంతుఁడీతఁడే నాచిత్తములో మలసీని దాకొని శుభములెల్లాఁ దానే వొసఁగును	॥చంచ॥
పరమపురుషుడు నాప్రాణనాథుఁడైనాఁడు పరగ నాపాలివాఁడై బ్రదికించును ధరణీశుఁ డీతఁడే నాదాపుదండై కడఁగీని నిరతి నేపొద్దును మన్నించును మమ్మెపుడు	॥చంచ॥
శ్రీవేంకటేశుఁడు నాజిహ్వఁ దగిలి వున్నాఁడు పావనునిఁ జేసి నాకు ఫల మిచ్చును గోవిందుఁ డీస్వామి నన్నుఁ గొలిపించుకొన్నవాఁడు యీవల నావల నాకు నిహపరా లిచ్చును	॥చంచ॥