ఆంధ్రభారతి - తాళ్లపాక అన్నమాచార్య కీర్తనలు - ఎట్టిదో మీమాయావిలాసము యెఱిఁగిన నెఱఁగనీదు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 161-1
సంపుటము: 2-293

తాళ్లపాక అన్నమాచార్య

రాగము: లలిత

ఎట్టిదో మీమాయావిలాసము యెఱిఁగిన నెఱఁగనీదు అట్టె మాగురు ననుమతినే ప్రత్యక్షమవైతివి గాని	॥పల్లవి॥
కరుణాకరా మిమ్మునుఁ గని తెలియఁగలేను ధర మీమహిమలు వినివిని తగ నరుదందుదును నరహరి నీవు నాలో నుండఁగ నమ్మక పురాణకథలందు అరయఁగ మీచరితలు చెప్పఁగ నాసతోడ మిముఁ దలంతును	॥ఎట్టి॥
జగదీశా మీనామంబులు జపించ నలయుదును వెగటుగ నీచిత్రసృష్టి చూచి మిము వెదకుదు నింతటను నగధర మీపై భక్తి సేయఁగ మనంబున వొడఁబడను పగటున మీరిచ్చు వరములకొరకే పలుమారు మీకు మెుక్కుకొందును	॥ఎట్టి॥
శ్రీవేంకటేశా నీమూరితి చింతించి చేపట్టఁగలేను దేవుఁడ వనియెడు విశ్వాసమునకే తిరముగఁ గొలిచెదను శ్రీవనితాధిప వేదాలు మిమ్మునుఁ జెప్పఁగా నే తర్కింపుదును వేవేలు పరుషలు సేవింపఁగ నీవే కర్తవని నిశ్చయింతును	॥ఎట్టి॥