ఆంధ్రభారతి - తాళ్లపాక అన్నమాచార్య కీర్తనలు - అవధారు పరాకుసేయకు మపరాధముగా నెంచకు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 161-3
సంపుటము: 2-295

తాళ్లపాక అన్నమాచార్య

రాగము: లలిత

అవధారు పరాకుసేయకు మపరాధముగా నెంచకు వివరింపఁగ నీవే గతి విష్ణుఁడ మన్నించఁ గదే	॥పల్లవి॥
నాకునాకే నీసన్నిధానము గల్పించుకొని చేకొని విన్నపములెల్లాఁ జేయుచున్నాఁడను కాకుసేసి నన్ను వీఁ డెంత గట్టువాయ యనక శ్రీకాంతా నీ వింతట నుందువు చిత్తగించి వినవే	॥అవ॥
చూచిచూచి నీమూరితి నాసొమ్ముగఁ జేసుకొని చేచేత నాలో ధాన్యము సేయుచున్నాఁడను కాచుకొని వీనికి నాకూఁ గారణ మేమనక యేచోటా నీరూపమే హరి యెదలోనుండఁ గదే	॥అవ॥
కోరికోరి నేనూరక నీకొలువు గడించుకొని చేరి నీవూడిగములు సేయుచున్నాఁడను యీరీతులు శ్రీవేంకటేశ్వర యివి యేఁటిసలిగె లనక నారాయణ సర్వేశ్వరుఁడవు నన్ను నేలఁ గదవే	॥అవ॥