ఆంధ్రభారతి - తాళ్లపాక అన్నమాచార్య కీర్తనలు - ఇప్పుడే నే నొడఁబడ మరవఁగఁ దగదు జెప్పితి యెల్లనాఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 163-3
సంపుటము: 2-302

తాళ్లపాక అన్నమాచార్య

రాగము: సామంతం

ఇప్పుడే నే నొడఁబడ మరవఁగఁ దగదు జెప్పితి యెల్లనాఁడు నెప్పున నే నెంతకల్లరినైనా నీదాసుఁడనని యందురుగా	॥పల్లవి॥
మఱతునో తలఁతునో నిన్ను మాఁటల నేతప్పు గలుగునో యెఱఁగక నీదాసులఁజూచి యేమని పలుకుదునో నెఱసిన నాకర్మఫలంబులు నీకు సమర్పణ సేసితిని మఱి నామీఁదట నేరము లెంచక మాధవ నన్నిటు రక్షించవే	॥ఇప్పు॥
అలతునో సొలతునో నే నీయందు భక్తి సేతునో సేయనో యెలమిని నీకు నివేదించక యేమేమి భుజియింతునో తలఁచేటి నామనసే నీకును ధనముగాఁ గప్పము వెట్టితిని పలుమరు నన్నును తగవుకుఁ దియ్యక పరమాత్మా ననుఁ గావఁగదే	॥ఇప్పు॥
నేరనో నేర్తునో నీకైంకర్యము నేమము లేమేమి మానితినో నీరూపము నే సేవించి యెక్కడ నే ననుమానించితినో మేరతోడ మావారు చెప్పఁగా మిమ్మింతట నే నమ్మితిని వారిఁ జూచైన శ్రీవేంకటేశా వరదుఁడవై మము మన్నించఁ గదవే	॥ఇప్పు॥