ఆంధ్రభారతి - తాళ్లపాక అన్నమాచార్య కీర్తనలు - అన్నిటా నీవే వుందునందువు గాన - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 167-3
సంపుటము: 2-324

తాళ్లపాక అన్నమాచార్య

రాగము: మలహరి

అన్నిటా నీవే వుందునందువు గాన యిన్ని నీవు పుట్టించిన వివి నీసొమ్ములే	॥పల్లవి॥
నిలిచిన రూపులెల్లా నీగుళ్లుగాఁ దలఁతు మెలఁగేటి చైతన్యము మిమ్ముగాఁ దలఁతు యిలలోని ధ్వనులు నీపలుకులుగాఁ దలఁతు సకల పంచభూతా లుపకరణాలుగాఁ దలఁతు	॥అన్ని॥
నారుకొన్న పంటలు నీనైవేద్యాలుగాఁ దలఁతు నీరెల్లా నీతీర్థమని నెమ్మిఁదలఁతు ధారుణి భోగాలు పూజాద్రవ్యాలుగాఁ దలఁతు నేరిచిన పనులెల్లా నీలీలలుగాఁ దలఁతును	॥అన్ని॥
కాలత్రయము నీగతులుగానే తలఁతు చాలి సురల నీయనుచరులఁగానే తలఁతు నాలోని శ్రీవేంకటేశ నాతండ్రివని తలఁతు తాలిమి నీదేవులను తల్లియని తలఁతును	॥అన్ని॥