ఆంధ్రభారతి - తాళ్లపాక అన్నమాచార్య కీర్తనలు - ఈతని మరచివుంటి మిన్నాళ్లును - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 183-3
సంపుటము: 2-417

తాళ్లపాక అన్నమాచార్య

రాగము: లలిత

ఈతని మరచివుంటి మిన్నాళ్లును యీతల నేఁడెచ్చరించె నీతఁడే పో విష్ణుఁడు	॥పల్లవి॥
తల్లియై పోషించు తండ్రియై రక్షించు వుల్లపు బంధువుఁడై వొడ లరయు మెల్లనె దాతై ఇచ్చు మెలుఁతయై యాదరించు యెల్లవిధబంధువుఁడు యీతఁడే పో విష్ణుఁడు	॥ఈత॥
యేలికయై మన్నించు నిష్టుఁడై బుద్ధి చెప్పు చాలుమానిసియై యంచలఁ దిరుగు బాలుఁడై ముద్దుచూపు ప్రాణమై లోన నుండు యీలాగుల బంధుఁ డీతఁడే పో విష్ణుఁడు	॥ఈత॥
దేవుఁడై పూజగొను ద్రిష్టిగోచరమై శ్రీవేంకటాద్రిమీఁద సిరు లొసగు తావై యెడమిచ్చు తలఁపై ఫలమిచ్చు యీవల నావల బంధుఁడీతఁడేపో విష్ణుఁడు	॥ఈత॥