ఆంధ్రభారతి - తాళ్లపాక అన్నమాచార్య కీర్తనలు - నేనేమిఁ జేయఁగలేను నీవు పరిపూర్ణుఁడవు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 186-2
సంపుటము: 2-433

తాళ్లపాక అన్నమాచార్య

రాగము: గుండక్రియ

నేనేమిఁ జేయఁగలేను నీవు పరిపూర్ణుఁడవు హీనుఁడ నే నధికుఁడ విన్నిటా నీవు	॥పల్లవి॥
దండము వెట్టుట నాది తప్పు లోఁగొనుట నీది నిండి నీవెప్పుడు దయానిధివి గాన అండఁ బేరుకొంట నాది అందుకు నూఁకొంట నీది దండియైన దేవదేవో త్తముఁడవు గాన	॥నేనే॥
శరణు చొచ్చుట నాది సరుగఁ గాచుట నీది పరమ పురుష శ్రీపతివి నీవు విరులు చల్లుట నాది వేవేలిచ్చుట నీది పొరి నీవు భక్తసులభుఁడ వటుగాన	॥నేనే॥
దాసుఁడననుట నాది తప్పక యేలుట నీది ఆసదీర్చే వరదుఁడ వటుగాన నీసేవ యొక్కటి నాది నిచ్చలుఁ గైకొంట నీది యీసులేని శ్రీవేంకటేశుఁడవు గాన	॥నేనే॥