ఆంధ్రభారతి - తాళ్లపాక అన్నమాచార్య కీర్తనలు - రామా రామభద్ర రవివంశరాఘవ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 186-6
సంపుటము: 2-437

తాళ్లపాక అన్నమాచార్య

రాగము: సాళంగనాట

రామా రామభద్ర రవివంశరాఘవ యేమి యరుదిది నీకింతటివానికిని	॥పల్లవి॥
నాఁడు రావణు తలలు నఱకిన లావరివి నేఁడు నాపాపములు ఖండించరాదా వాఁడిప్రతాపముతోఁడ వారిధిగట్టిన నాటి- వాఁడవిట్టె నామనోవార్ధిఁ గట్టరాదా	॥రామా॥
తనిసి కుంభకర్ణాది దైత్యుల గెలిచితివి కినిసి నాయింద్రియాల గెలువరాదా యెనసి హరుని విల్లు యెక్కుపెట్టి వంచితివి ఘనము నాదుర్గుణము కడు వంచరాదా	॥రామా॥
సరుస విభీషణుఁడు శరణంటేఁ గాచితివి గరిమ నే శరణంటిఁ గావరాదా తొరలి శ్రీవేంకటేశ దొడ్డుగొంచ మెంచనేల యిరవై లోకహితానకేదైనా నేమీ	॥రామా॥