ఆంధ్రభారతి - తాళ్లపాక అన్నమాచార్య కీర్తనలు - తలఁపులో కొట్టగొన దైవమే వున్నాఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 187-2
సంపుటము: 2-439

తాళ్లపాక అన్నమాచార్య

రాగము: గుండక్రియ

తలఁపులో కొట్టగొన దైవమే వున్నాఁడు తలఁచిన రూపులెల్లా తా నయ్యీనయ్యా	॥పల్లవి॥
కలలో ప్రపంచము కంటి నే నొకటి వెలినున్న ప్రపంచవిధివలెనే కలనున్నవాఁడ నేనే వెలి నన్నువాఁడ నేనే తెలి(య?) మాబతుకు రెంట దెప్పరములయ్యా	॥తలఁ॥
దేహమీఁడ నుండఁగానే దిక్కులకేఁగీ మనసు దేహముతో దిక్కులెల్లాఁ దిరిగినట్టే దేహములోవాఁడ నేనే దేహముపై వాఁడ నేనే వోహో మాజన్మములో నొకటి రెండయ్యా	॥తలఁ॥
కన్నులెదుట శ్రీవేంకటపతిఁ గొలిచెద కన్నుమూసి యాతనినే కమ్మర భావించెదను కన్నులోపల నేనే కన్నులవెలిని నేనే వున్నతి నీరెండును వొక్కటాయనయ్యా	॥తలఁ॥