ఆంధ్రభారతి - భద్రాచల రామదాసు కీర్తనలు - అంతా రామమయంబీ జగమంతా రామమయం

వరాళి - ఆది

పల్లవి:

అంతా రామమయంబీ జగమంతా రామమయం అం..

చరణము(లు):

అంతరంగమున నాత్మారాముం డ
నంతరూపమున వింతలు సలుపగ అం..

సోమసూర్యులును సురలును తారలును
ఆ మహాంబుధులు నఖిల జగంబులు అం..

అండాండంబులు పిండాండంబులు
బ్రహ్మాండంబులు బ్రహ్మ మొదలుగ అం..

నదులు వనంబులు నానామృగములు
విదితకర్మములు వేదశాస్త్రములు అం..

అష్టదిక్కులును నాదిశేషుడును
అష్టవసువులును నరిషడ్వర్గము అం..

ధీరుడు భద్రాచల రామదాసుని
కోరిక లొసగెడి తారకనామము అం..