ఆంధ్రభారతి - భద్రాచల రామదాసు కీర్తనలు

శంకరాభరణ - త్రిపుట

పల్లవి:

ఇతడేనా ఈ లోకములో గల
పతితుల నెల్లను పావనము చేయువాడు ఇ..

చరణము(లు):

పరిపూర్ణకరుణచే బ్రహ్మాదుల గాచిన
నరసింహుడైనట్టి నళినదళేక్షణుడు ఇ..

ఇల లంకపురమున అవనిజను బ్రోవ
బలుడైన రావణుని పరిమార్చినవాడు ఇ..

అలనాడు ద్రౌపతికి అక్షయవలువలు
వల నొప్పనొసగిన వైకుంఠవాసుడు ఇ..

ఏ వేళ మునివరులు నితర చింతలు మాని
కేవలము మదినుంచి కొలువు గాచెడువాడు ఇ..

ప్రేమను దయతో నాపన్నుల బ్రోచుచు
రామదాసునేలు రామచంద్రవిభుడు ఇ..