ఆంధ్రభారతి - భద్రాచల రామదాసు కీర్తనలు - దినమే సుదినము సీతారామ స్మరణే పావనము ది..

సావేరి - ఆది (కాపి- త్రిపుట)

పల్లవి:

దినమే సుదినము సీతారామ స్మరణే పావనము ది..

చరణము(లు):

ప్రీతినైనా ప్రాణభీతినైనా కలిమి
చేతనైనా మిమ్మేతీరుగ దలచిన ఆ ది..

అర్థాపేక్షను దినము వ్యర్థము కాకుండ
సార్థకముగ మిమ్ము ప్రార్థనజేసిన ఆ ది..

నిరతము మెరుగు బంగారు పుష్పముల రఘు
వరుని పదముల నమరపూజించిన ఆ ది..

మృదంగతాళము తంబురశ్రుతిగూర్చి
మృదురాగము కీర్తన పాడినను విన్న ఆ ది..

ఘనమైన భక్తిచే పెనగొని యేవేళ
మనమున శ్రీరాముని చింతించిన ఆ ది..

భక్తులతో ననురక్తిని గూడుక
భక్తిమీరగను భక్తవత్సలుపొగడు ది..

దీనశరణ్య మహానుభావ యో గానలోల
నను కరుణింపుమని కొలుచు ఆ ది..

వాసిగ శ్రీహరిదాసుల గూడుకొని
వాసుదేవు వాంఛతోను బాడెడి ఆ ది..

అక్కరతోడ భద్రాచలమునను
చక్కని సీతారాముల జూచిన ఆ ది..