ఆంధ్రభారతి - భద్రాచల రామదాసు కీర్తనలు - బూచివాని పిలువబోదునా ఓ గోపాలకృష్ణా బూ..

పంతువరాళి - రూపక

పల్లవి:

బూచివాని పిలువబోదునా ఓ గోపాలకృష్ణా బూ..

అను పల్లవి:

బూచివాని పిలువబోతె వద్దు వద్దు వద్దనేవు
ఆ చిచ్చి జోలపాడి ఆయిఊచిన నిదురపోవు బూ..

చరణము(లు):

మత్తగజముతెచ్చి చిన్నతిత్తిలో నమర్చి నాదు
నెత్తిమీద బెట్టి నన్ను ఎత్తుకోమనేవు కృష్ణా బూ..

అల్లమూరుగాయ పెరుగు అన్నమారగించమంటె
తల్లి వెన్నపాలు నాకు తెమ్ము తెమ్ము తెమ్మనేవు బూ..

రోటగట్టివేతు కృష్ణా రామదాసవరదా నీవు
మాటిమాటికిట్లు నన్ను మారాము చేసితేను బూ..