ఆంధ్రభారతి - భద్రాచల రామదాసు కీర్తనలు - రామజోగి మందు కొనరే ఓ జనులార రా..

ఖమాఛ్‌ - ఆది

పల్లవి:

రామజోగి మందు కొనరే ఓ జనులార రా..

అను పల్లవి:

రామజోగి మందుకొని ప్రేమతో భుజియించుడన్న
కామక్రోధ లోభమోహ ఘనమైన రోగాలకు మందు రా..

చరణము(లు):

కాటుక కొండలవంటి కర్మములెడబాపే మందు
సాటిలేని జగమునందు స్వామి రామజోగిమందు రా..

వాదుకు చెప్పినగాని వారి పాపములు గొట్టి
ముదముతోనే మోక్షమిచ్చే ముద్దు రామజోగిమందు రా..

ముదముతో భద్రాద్రియందు ముక్తిని పొందించే మందు
సదయుడైన రామదాసు ముదముతో సేవించే మందు రా..