ఆంధ్రభారతి - కవితలు - బులిపింపులు - బంగారిమామ పాటలు - కొనకళ్ల వెంకటరత్నం

10. బులిపింపులు

బంగారిమామ:	పూలివిగో, రంగుల పూలివిగో, గమగమ పూలివిగోనే - పూలల్లో నీ అందము పొంచున్నదిలే! అందము పొంచున్నదిలే!
కోడలుపిల్ల:	పూలంటేనే చిరాకు! పూలొద్దోయీ మామ! పూలొద్దోయీ, ఆ పువ్వులు నీ జడకెంతో పొలుపంటవులే ఎంతో పొలుపంటవులే!
బంగారిమామ:	పళ్లివిగోనే ముగ్గిన పళ్ళివిగో! తీయని పళ్ళివిగోనే! పళ్ళుతింటె కలలన్నీ పంటకొస్తవీ కలలే పంటకొస్తవీ!
కోడలుపిల్ల:	పళ్ళంటేనే వెగటు పళ్ళిట కొల్లలు, మామ పళ్ళొద్దోయీ! పండుతింట పలుకొక్కటీ పలకమంటవు! ఒక్కటి పలకమంటవు!
బంగారిమామ:	కతసెబుతానే పిల్లా, కతసెబుతా రావే, కతసెబుతానే! ఆ కతలో మనుషులనిట్టే కళ్ళకు గడతా! చక్కా కళ్ళకుగడతా!
కోడలుపిల్ల:	కతలంటే మా విసుగూ, కతలొద్దోయీ మామ, కత విననోయీ! కతలోపల జంట నొకటి కలిపిస్తవులే! జంటను కలిపిస్తవులే!
బంగారిమామ:	పదం పాడ మం టావా? పద మినుకుంటావా? వో పదమింటావా? కూకుని పదం పాడతా, గుండెలు పదిలము పిల్లా! గుండెలు పదిలము పిల్లా!
కోడలుపిల్ల:	పదమంటేనే గత్తర, పాటంటేనే మంటా! పదమొద్దోయీ, నీ పదమినగానే నెత్తురు పదు నొస్తదిలే! చురచుర పదు నొస్తదిలే!
బంగారిమామ:	ఏటిమళుపులో వాలే, ఇసకల పైపయి సోలే ఎన్నెల సూడోలే, మా ఇల్లిల్లని పలవరిస్త వేటి సరసమే? అవురా ఎంత విరసమే!
కోడలుపిల్ల:	సన్నగ పురివిచ్చే ఈ వెన్నెల వూసేలో అది మున్నే తెలుసునులే వో వెన్నెల పవళింపుల కిది వేళంటవులే! ఇది వేళంటవులే!