ఆంధ్రభారతి - కవితలు - ఎందుకో ఈ రేయి - బంగారిమామ పాటలు - కొనకళ్ల వెంకటరత్నం

8. ఎందుకో ఈ రేయి

కోడలు పిల్ల:	ఎందుకో ఈ రేయి ఇంత చల్లని హాయి! పయన మెందాకాను బంగారి మామా వయనాలు తెలుపోయి వయ్యారి మామా
బంగారిమామ:	పైరగాలికి తూగి పంట లచ్చిమిదేవి పవ్వళించేవేళ పల్లదనమేలె! నగవాకె వగలాడి నా చిన్నరాణీ!
కోడలు పిల్ల:	మంచోడని నమ్మి మామ నీతోవస్తె, మనిషి మసలని యేటి మళుపులో నటరా మాటామంతీ లేని మౌనాలు రాజా!
బంగారిమామ:	ఒంటిగా నీవెంట ఒక్కగడియే చాలు, అడుగులో అడుగేవె అందాల దేవి! మాట లెందుకులేవె మనసున్నచోట
కోడలు పిల్ల:	మిసమిసల్‌ చిమ్మేటి మిరపతోటల నీటు కాటుకల చీకటుల కరిగిపొయ్యేను! నిలుమోయి భయమాయె నీ పున్నెమోయి
బంగారిమామ:	కతచెప్పమని నన్ను కవ్వించి కవ్వించి కతకు మూలము జంట కలవకుండానే కదిలిపోదామటే కటికిమనసేమే!
కోడలు పిల్ల:	ఏరు తగిలిందంటే ఎనక దారిక సున్న; తోట జీబురుమంట తొంగిచూచేను! దవుదవ్వు పోతావు దరికేనిరావు!
బంగారిమామ:	సరుకు తోటల వెన్క చందమా మడుగోను, కోరడవతల ఒక్క కోరికున్నాది- చిన్ని ముద్దొకటీవె చిటిమల్లెపూవ!