శస్త్రాస్త్రవిద్యావిశాలుండ వధిక
నిస్త్రాసుఁడవు నీతినిపుణుండవరి వి
నాశనకృతివి భూనాక భయుఁడవు
భాసురబలుఁడవు పద్మజదత్త
వరశరధన్యుండ వతికోవిదుఁడవు
పొరిఁబొరి గాఢతపో రక్షకుఁడవు
గురుఘనభుజవీర్యగుప్తుండ వఖిల
..........
వినుతప్రతాప సంవృతవిక్రముఁడవు
ననవరతంబును నఖిలలోకముల
నని నోర్చి విజయంబు లందినవాఁడ
వనఘుండ వీ విల ననిమిషసేన
పోఁడిమి జెడఁదోలి పురుహూతుఁబట్టు
నాఁడెఱుంగుదును నున్నతబాహుబలము
భూరిశస్త్రాస్త్ర తపోబలంబులను
వారక ననుఁబోలువాఁడ వీ వాజి

మనసు గుందఁగ జంబుమాలియు మొదలు
దనుజులు పోరి యా తరుచరుచేతఁ
బొలిసిరి యని వానిఁ బొలియింపఁజాలు
బలియు నెవ్వనిఁగాన బలియుండవీవు
కావున దానవాగ్రణులతో నేఁగు
వావిరితోడఁ దీవ్రత జన్యమునకు

తనయుఁడ! విను, రాజధర్మక్రమంబు
పనుపడ శస్త్రాస్త్రబలము దక్కంగఁ
దక్కినబలములు ధర నిష్ఫలంబు
లక్కజంబుగ వాయు వాశుగమనము
ననలుఁడు కడుతీవ్రమైనట్టి శిఖల
వెనుకొని జగముల విజయంబు నొందు
పగిది నా వానరప్రముఖునిఁగదిసి
యగణితభుజబలం బభినుతి కెక్క

..........యా మేఘనాదుఁ
డెనసినబంధులనెల్ల వీడ్కొనుచు
ననుపమాశనికల్పమై ఘోరదంష్ట్ర
ఘనసుకళాస్యముల్‌ గామచారంబు
గరుడవేగంబును గల్గునాభీల
తురగచతుష్కంబుతోడఁబెంపొదవి
పనుగొనుశస్త్రాస్త్ర భరితంబు నగుచు
ననలార్క సంకాశ మగు..........

జగతీతలము దిశల్‌ సరివ్రయ్య నార్చి
యగణితవేగుఁడై యట మింటి కెగయఁ
గనుఁగొని దానవాగ్రణి యల్క మదిని
దనరఁగ నప్పుడు ధనువు మ్రోయించి
యాతతరత్నపుంఖాంచితప్రభల
ఖ్యాతి మించిన నేమిఘట్టనోద్ధూత
ధరణీపరాగాంధతమసంబు నణఁపఁ
బొరినొప్పు గరుసముద్భూతవాతూల
ఘాతంబుచే బలాకలు దూల నశని
పాతవేగంబులౌ పటుకాండసమితి
నెఱ తెగగొని వడి నిగుడించుటయును
నఱిముఱిఁగోపించి హనుమంతుఁడపుడు
శరముల కెదురుగాఁజనుచు మహోగ్ర
శరమండలస్థమౌ శరలక్ష్యమనఁగ
గురుతరంబైన జవోన్నతిఁదిరిగి
శరముల నడఁచి ఖేచరుఁడునై మలసి
శరవేగలక్ష్యగోచరుఁడు గాకిట్లు
దుర మొనరించె నద్భుతపౌరుషమున

అనుపమంబగు రథంబాజిఁగూలుటకు
ఘనబాణతతులు మోఘంబు లౌటకును
దన వ్రేటు పోటును దాఁక కుండుటకు
దన మది కొండొకతడవు చింతించి
యితఁడవధ్యుఁడజేయుఁడే నింక నుఱక
యతివేగ మగుడిన ననుచితంబనుచు

..........ఁడవశుఁడై తెలిసి
చింతించి యిది యేమి చిత్రమో?తనకు
నీ యస్త్రమున భయం బెఱుఁగక యుండఁ
దోయజాసనుఁడిచ్చెఁ దొలుత వరంబు
ననుచు నా బాల్యమం దాంగిరసాఖ్య
మునికి భార్గవుఁడను ముని శిఖామణికి
వరగర్వి నగుచు నవజ్ఞ గావింప
నఱిముఱిఁగోపించి యమ్మునీశ్వరులు
దనకు బ్రహ్మాస్త్రబంధము ప్రాప్తమగుచు
ననువుగా ఘటికాత్రయార్థము బాయ
శాపించి రదియు నిశ్చలబుద్ధి నెఱిఁగి
పాపదూరులు వారి పలుకొండు నగునె?
ఘటికాత్రయార్థంబు గడచిన పిదప
చటులబంధము లూడు సరి నదిగాక
బ్రహ్మేంద్రమారుతుల్‌ పాలించునాకు
బ్రహ్మాస్త్రబంధముల్‌ పాయుటెంతనుచు
నజుని యానతి గొంత యనుసరించుచును
రజనీచరేంద్రుడౌ రావణుకడకుఁ
జని కొన్నిమాటలు సరసత నాడి
తనరారు నతని చిత్తస్థితి గొంత
యారసి చూచెద నాతని కడకు
నీ రీతిఁజనకున్న నిఁక దుర్ఘటంబు
గావున నిపుడె రాక్షసుని పాలికిని
బోవలెఁగాకంచుఁ బొలుపొందుచుండె
పడినమారుతిఁజూచి పట్టుఁడు కట్టుఁ
డడువుఁడు పొడువుఁడంచఖిలరాక్షసులుఁ
జుట్టు ముట్టి కఠోరసూత్రజాలముల
గట్టిగాఁగట్టిరి కట్టల్క నిగుడఁ
బావని రావణుఁబరికింపఁగోరి
వావిరి నొప్పెడువాఁడు గావునను
దనదుబంధము విముక్త మగుట యెఱిఁగి
కనుకని దైత్యులకట్టుల తర్జ
నములను బోటుల నాటుల భర్జ
నముల నందంద వెంబడి విచేష్టుండ
పోలినట్లుండె నార్పులు నింగిముట్ట
వాలు చేఁగొనుచు నవారితశక్తి
నంతకాకారుఁడై యతికోపుఁడగుచు
నెంతయు రయమున..........

..........
బలియుఁడై తాఁకట్టఁబడియున్నయపుడె(డు)
యితరబాణములవి యెంత దలంప
నితనికి నతిబలాన్వితవిక్రమునకు

ఎక్కడివాఁడొ? వీఁడెవ్వఁడో? పనుప
స్రుక్కక యీ పురి సొచ్చి రాక్షసుల
నిలఁగూల్చె వీని వధింతము కాల్త
మెలమి మ్రింగుద మంచు నిందును నందుఁ
గట్టి యీడ్చుచును బ్రక్కలు పొడుచుచును
బెట్టుగా నిరసించి బెరయునయ్యెడను
రక్షోగణేశుండు రౌద్రంబు నిగుడ
వృక్షచారుని నతివిస్ఫురితాక్షుఁ
డగుచుఁజూచిన విస్మయభ్రాంతుఁడగుచు
నగణితంబగుచు దివ్యంబులైనట్టి
తతభర్మభూషణోదంచితకాంతి
నుతగతి సౌదామినులయొప్పు మిగుల
రమణీయతనులిప్తరక్తచందనము
విమలమౌ నెఱసంజవిధమునై మెఱయ
మకుటనానారత్నమణిగణదీప్తి
ప్రకటపర్జన్యచాపప్రభల్‌ నిగుడ
భూరివక్షంబునఁ బొలుపొందు తార
హారజాలము బలాకాళి చెల్వొలయ
భయదహుంకృతి గర్జపగిదినై చెలఁగ
మెయి మేచకాభ్రంబు మెలుపునఁదనర
దృష్టి కక్కజమారుతేజంబెసంగ
సృష్టి భయంబందఁ జేయుచునున్న
వాఁడిట్లు మగఁటిమివాలియు మహిమ
పోఁడిమి నొంది విస్ఫూర్జితపంక్తి
మస్తకోదరబాహుమహితకఠోర
విస్తరోరస్థ్సలీవికటభ్రూకుటుల
చటులరక్తాస్యప్రజ్వలితవిఘూర్ణ
పటువిస్ఫులింగ విస్ఫార నేత్రోగ్ర
లంబోష్ఠదంష్ట్రా కరాళరక్తాగ్ని
చుంబితదిశుఁడు చక్షుర్భీతికరుఁడు
హాటక శైలశృంగాంచిత దివ్య
జూటరత్నవిచిత్రశోభితాననుఁడు
సకలలోకైక భీషణుఁడు సంగ్రామ
వికటభాషణుఁడు విద్వేషిదూషణుఁడు
చారుదుకూలవస్త్రసమన్వితుండు
నై రూఢికెక్కి యుదాత్తవైఖరులఁ
గరములఁగంకణక్వణనముల్‌ మొరయ
సరస నప్సరతతుల్‌ చామర లిడఁగ
నా సుధర్మాస్థానమందుఁజింతామ
ణీసింహపీఠి నుండెడు నింద్రుఁడనఁగ
మానితంబగు సభామంటపవేదిఁ
బూని సింహాసనంబున నున్నవాని
నలరి పార్శ్వములఁబ్రహస్తాదిమంత్రు
లలవుమై సేవింప నటనిటఁజేరి
గరుడోర గామరగంధర్వభర్త
లురుమతిఁగొల్వఁబెంపొందురావణునిఁ
గనుఁగొని యంతరంగంబునఁజాల
వినుతించి మఱియును వెసనిట్టులనియె
నీ రూపవిభవంబు లీ ఘనబాహు
సార మీ ధృతి యిట్టి సౌందర్యమమిత
ధీరగుణంబు నుద్దీపితోదార
మీ రాక్షసేశ్వరు కిట్లొప్పె నౌర!
పాతకమూర్తి దుర్బలుఁడును దైత్య
జాతుఁడు గాకున్న శక్రాదిదేవ
వ్రాతంబులకు నధీశ్వరుఁడునై తనరి
యీతఁడు లోకంబు లేలంగఁదగఁడె?
యనునంత రోషతామ్రాక్షుఁడై కనలి
కనుఁగవలం దగ్నికణములు దొరుఁగ
ననయత నపుడు ప్రహస్తుతోఁగూడి
హనుమంతుఁజూచి..........

దనయులావునకుఁదద్దయు సంతసిల్లె
హనుమంతుఁడప్పు డయ్యసురేశుఁజూచి
వీనికి సరి గద్దె వేతు నన్మాడ్కిఁ
బూని వాలము వెంచి పొసగఁ గూర్చుండి
పటుతరనవరత్న భద్రపీఠమున....
..........
శిరములు పదియును జేతు లిర్వదియు
వరభూషణంబులు వైభవస్ఫురణ
దశకిరీటద్యుతుల్‌ దశదిశల్‌ వెలుఁగ
దశకంధరునిపేరు దనరు నతనికి
నిదిగాక కొడుకులు హితులు సోదరులు
మదమేది బలములు మంత్రులు గొలువఁ
గరకంకణంబులు గల్లుగల్లనఁగ
వరుస వింజామరల్‌ వనితలు వేయఁ
ద్రిదశులతోఁగూడ దేవేంద్రుపగిదిఁ
ద్రిదశారి సభయందు దీపించె నవుర!
మెఱుఁగుతోఁగూడిన మేఘంబుకరణి
నరుదంది రావణు నమర వీక్షించి
కడఁగి రామద్రోహి కాకుండెనేని
ఒడయండుగాఁడె?యీ యుర్వియంతటికి
నని రాఘవునిచేత నసురేశుఁడల్గు
ననుచు విస్మయమంది యగచరుఁడున్న
గనుఁగవఁగోపాగ్నికణ..........
..........

సురగణాధీశుండొ? శుక్రుఁడో?దండ
ధరుఁడొ? గృతాంతుఁడొ? దానవేశ్వరుఁడొ?
వరుణుఁడో? వాయువో? వైశ్రవణుండొ?
యిరవార నిటకు నిన్నెవఁడు పుత్తెంచె?
వాని నెఱింగింపు వలను మీఱఁగను
బూనినభయమున బొంకక నీవు

అనవుడు హనుమంతుఁడతికోపుఁడగుచు
దనుజనాయకునితో దర్పంబునెసగ
వాలంపుగద్దెపై వలనొప్ప నుండి
యా లోనఁబ్రతిమాట లాడఁగఁగడఁగి
యనిలనందనుఁడంత నద్దశకంఠుఁ
గనుఁగొని..........