శ్రీమహాభారతము - శాంతిపర్వము - పంచమాశ్వాసము - తులాధారుఁడు జాజలికిం చెప్పిన బ్రహ్మగీతలు - కవిత్రయ భారతము - కవిత్రయము - నన్నయ - తిక్కన - ఎఱ్ఱన - ఆంధ్రమహాభారతము

తులాధారుఁడు జాజలికిం చెప్పిన బ్రహ్మగీతలు (సం. 12-256-7)

వ.	అని మఱియు నిట్లను ‘బ్రహ్మగీత లను వాక్యంబు లాకర్ణింపుము.	246
క.	యాగంబునందు శ్రద్ధా \| యోగముగల యశుచి శ్రద్ధ యొనరని శుచి పు ణ్యాగమసంపదఁ దుల్యులు \| గా గణుతించిరి నిరూపకత నమరవరుల్‌.	247
క.	విను! మజుఁడు శ్రద్ధ యతిపా \| వని, యది గలవాఁడు గౌరవశ్రేష్ఠుం; డా తని యన్నము భోజ్యతరం \| బని నిర్దేశించె నెల్ల యమరులు వినఁగన్‌.	248
ఉ.	వారక వడ్డి కిచ్చి కుడువన్‌ వెరవారిన దానశీలు నె వ్వారికిఁ జేయుఁ జూపక ధ్రువంబుగ లోభగుణంబ పట్టి ని స్సారత నుండు వేదవిదు సామ్యముఁ జేర్చి రమర్త్యులందు న వ్వారిజసూతి దాని యగువాఁ డధికుం డనియెన్‌ హవిర్విధిన్‌.	249
ఆ.	దానగుణము శ్రద్ధ లేనివానికి లేదు \| గాన యివ్విధమునఁ గమలభవుఁడు నిశ్చయించె; నీవు నిర్మలశ్రద్ధాభి \| పూతమతివి గమ్ము పుణ్యచరిత!	250
ఆ.	వినుము శ్రద్ధ గలుగు మనుజుండు పాపంబుఁ \| దొలఁగఁ ద్రోవనేర్చుఁ; దోలు డిగ్గ నూడ్వ వెరవు గలుగు నురగంబు చాడ్పునఁ \| గాన మేలు శ్రద్దధానుఁ డగుట.’	251
వ.	అని వెండియు.	252
ఆ.	‘మత్సరాది చిత్తమాలిన్యములు శ్రద్ధ \| గల మనంబునందు నిలువనేర’ వనినఁ దేఱి యిట్టులనియె జాజలి తులా \| ధారుతోడ నిభృతిఁ గౌరవేంద్ర!	253
క.	మునులవలనఁ దత్త్వం బే \| వినకుండుటఁ జేసి యిట్టివిధము గలిగె నా కనఘా! నీ వాక్యంబుల \| మనంబు దెలివొందె శాంతి మరగెద నింకన్‌.’	254
వ.	అనిన నభినందించి తులాధారుండు.	255
క.	తన తన తెరువునఁ గర్మం \| బనుష్ఠితం బైన మేల యనఘ! నివృత్తిం గని శ్రద్ధ గూర్పఁగా నే \| ర్పెనయంగా వలయు దాని యెడయం దతఁడున్‌.	256
ఆ.	అట్లకాక యని ప్రియంబుమై వీడ్కొని \| జాజలియును జనియె రాజవర్య! యిహపరముల నెసకమెసఁగ సౌఖ్యము తులా \| ధారుఁడును సమున్నతత్వ మొందె.	257
క.	ఆ వణిజుఁడు ధర్మస్థితి \| దేవతలును మెచ్చునట్లు దెలియఁగఁ బలికెన్‌ నీ వీ వాక్యము లన్నిట \| భావం బలవఱిచి కసటు వాపుము వత్సా!’	258
వ.	అని చెప్పినం బ్రమదంబు నొంది.	259
క.	సురసరిదాత్మజుతోఁ గురు \| నరపాలోత్తముఁడు వినయనమ్రుం డగుచున్‌ ‘జిరమో కార్యసమీక్ష య \| చిరమో వలయునది కరుణఁ జెప్పు’ మనవుడున్‌.	260
వ.	అతం డతని కిట్లనియె:	261
క.	‘త్వరితము సేయక కార్యము \| చిరంతన విమర్శనముగఁ జేసి యొనర్పన్‌ ధరణీశ్వర! యోటువడఁడు \| పురుషుఁడు; సిద్ధియును వానిఁ బొందు దృఢముగన్‌.	262
క.	తాలిమి లేని జనంబులు \| మేలెఱుఁగక యట్టివాని మీఁదను జాడ్యం బాలస్యం బిది యని దో \| షాలోచన మాచరింతు; రది మతి యగునే?	263
వ.	అని చెప్పి వెండియు నిట్లను ‘నీవడిగిన యర్థంబు మేధాతిథి యను మునిసుతుండు చిరకారి యనువాని వృత్తాంతంబు వినినం దెలియు; దానిం జెప్పెద.	264