శ్రీమహాభారతము - అశ్వమేధపర్వము - చతుర్థాశ్వాసము - అగస్త్య మహాముని ద్వాదశ వార్షిక యజ్ఞ ప్రభావము - కవిత్రయ భారతము - కవిత్రయము - నన్నయ - తిక్కన - ఎఱ్ఱన - ఆంధ్రమహాభారతము

అగస్త్య మహాముని ద్వాదశ వార్షిక యజ్ఞ ప్రభావము (సం. 14-95-4)

సీ.	‘ఇవ్విషయంబున నెందుఁ బ్రసిద్ధతం \| బరఁగెడు నట్టిది ధరణినాథ! వినుతేతిహాసంబు వినుము చెప్పెద; నగ \| స్త్యుండు పండ్రెండేండ్లు సువ్రతాభి రతిఁ జేయు మహితాధ్వరమునకు దివ్యాను \| భావంబు గలయట్టి పరమమునులు వేడ్క ఋత్విజులయి వెలయ నిజప్రౌఢి \| నఖిల తంత్రంబులు నాచరింప;
తే.	నా సమయమున వర్షింపఁ డయ్యె నింద్రుఁ \| డోషధులు వికలత్వంబు నొందె; దానిఁ జూచి యత్తపోధను ‘లగస్త్యునకు నన్న \| దానవిధు లెట్లు చెల్లునో తగు విధమున.	261
వ.	ఇతండు ద్వాదశవార్షికం బైన దీక్షా విశేషంబు నొందినవాఁడు; ధర్మమార్గాగతం బయిన ద్రవ్యంబు దక్కనొండు వినియోగింపండు; వానయుం గురియ; దని ముచ్చిరి తమలోఁ బలుకు పలుకులు ప్రతాపదీపితుం డగు నక్కుంభసంభవుం డాలించి వారలతో నిట్లనియె.	262
ఉ.	‘న్యాయము గల్గి యధ్వరమునందు విఘాతము పుట్టకుండఁ దాఁ డోయదకోటిఁ బన్చి హరి తుష్టిగ వృష్టి యొనర్పకున్న నే నా యమరేంద్రతం గొని మహాద్భుత వృత్తి జగంబుఁ బ్రోచెదన్‌; మీయెదఁ జింత దక్కుఁడు సమిద్ధతపఃపరులార! నా దెసన్‌.	263
క.	కాదేనిఁ ద్రిజగముల బహు \| ళోదార ద్రవ్యకోటు లున్న యునికి మీ పాదముల పరిసరమునకుఁ \| దే దొరఁకొను; నశ్రమమునఁ దెచ్చెద వానిన్‌.	264
తే.	అంత చేయంగవలయునే యన్న ననఘు \| లార! యుత్తర కురుభూము లారఁ బండి యున్నయవి; యాగ కాలోచితాన్నమునకు \| వలయు ధాన్యముల్‌ తలఁపున వచ్చు నిందు.’	265
వ.	అని పలికి వెండియు.	266
క.	‘ఆ జాలియేల? నిర్మల \| బీజహవిస్తంత్ర మేను బ్రీతి నొనర్పం గా జగతి వఱపునం జెడు \| నే? జన్నము విఘ్నపడునె? యేటికి వగవన్‌.’	267
సీ.	అన విని ‘నీవు ధర్మాగతి సంసిద్ధ \| వస్తుదాయిని; నిరవద్య తపము వ్యయముగా నీ కేల వాసవుపై కిన్క? నఖిల జగద్ధన మాహరించి కొననేల? యుత్తర కురుభూములందలి \| ధాన్యంబు లేల? సన్మాన్యబీజ హుతములందు ఫలేచ్ఛ యోజింప నేల? మా \| కై యిన్ని దెఱఁగులయందుఁ బాఱె
తే.	నీదు చిత్తంబు; దీని వినిశ్చయముగఁ \| జేసి సుఖి వగు; మేము మా చేసినట్టి సుకృతములఁ దెచ్చికొందుము సులభములుగ \| వలయు నాహారములు; లోకవందనీయ!’	268
మ.	అని సల్లాపము సేయుచుండఁగ ననేకాంభోదజాలంబులన్‌ బనిచెం బెల్లుగ వర్షముల్‌ గురియఁగాఁ బర్జన్యుఁ డా ప్రొద్ద; తా నును నాచార్యుఁ బురస్కరించికొని నన్నుం గావవే యంచు న మ్మునిశార్దూలునిఁ గానవచ్చె వినయంబున్‌ భక్తియుం దోఁపఁగన్‌.	269
ఉ.	వచ్చిన గారవించి, యనవద్యపు టర్చన లిచ్చి సంయముల్‌ మెచ్చఁగ శాంతసద్వచనలీలఁ బ్రమోద మొనర్చి యాతనిం బుచ్చె సురేజ్యయుక్తముగఁ బోఁడిగఁ గ్రమ్మఱ వేల్పువీటి కా సచ్చరితుండు; లోకమును సంతస మందె; వెలింగె జన్నమున్‌.	270
తే.	క్రతు సమాప్తి సమయమున నతఁడు వినయ \| భరితుఁఢై యోగ్యభంగి నప్పరమ మునుల కర్చ లిచ్చి యామంత్రణ మాచరింప \| వారుఁ బ్రీతి నేఁగిరి నిజావాసములకు.	271