శ్రీమహాభారతము - ద్రోణపర్వము - పంచమాశ్వాసము - కృష్ణార్జునులు సల్లాపంబు లొనరించుచు ధర్మజుకడ కరుగుచుండుట - కవిత్రయ భారతము - కవిత్రయము - నన్నయ - తిక్కన - ఎఱ్ఱన - ఆంధ్రమహాభారతము

కృష్ణార్జునులు సల్లాపంబు లొనరించుచు ధర్మజుకడ కరుగుచుండుట (సం. 7 - 122 - 1)

వ.	దేవా! వైశంపాయనుండు జనమేజయున కిట్లనియె: నట్లద్భుతోదారంబగు నరనారాయణుల విక్రమ విహారంబు విని వెఱఁగంది యాంబికేయుండు సంజయు దిక్కు మొగంబై.	2
క.	‘ఇవ్విధమున సైంధవుఁ డా \| కవ్వడిచేఁ బడిన పిదపఁ గౌరవు లెట్లై రవ్వార్త సెప్పు’ మనవుడు \| నవ్విభునకు నాతఁ డిట్టు లనియె నరేంద్రా!	3
వ.	అట్లు పాండవ బలంబులు పొంగి కడంగి కుంభసంభవుమీఁదం గవిసి కయ్యంబు సేసె; నా సమయంబున నిక్కడ.	4
చ.	కృపుఁడును ద్రౌణియుం గడఁగి క్రీడిపయిన్‌ శర వర్షముల్‌ మహో గ్రపు రభసంబునం గురియఁగా నవి మాన్చి యతండు వారలం గుపితుఁడు గాకయున్‌ విశిఖ కోటుల నల్లన కప్పు పెల్లునం గృపుని శరీర మొయ్య నొఱగెన్‌ రుధిరచ్యుతి మూర్ఛ వచ్చినన్‌.	5
వ.	ఇట్లు కృపాచార్యుండు రథంబుమీఁదం బడినఁ దత్సారథి దేరు దొలంగం దోలుకొని పోయె; నశ్వత్థామయు నోహటించి తొలంగెఁ; దక్కటి రథికులు పైఁబెట్టంజాలక యంతంత నిలిచి;రట్లు శారద్వతుండు దనయమ్ముల మూర్ఛిల్లుట సూచి సవ్యసాచి వగచె; నప్పు డన్నరునిఁ గౌఁగిలించుకొని నారాయణుం డి ట్లనియె:	6
క.	‘కురుబలముఁ దొడరి గెలువఁగ \| సుర గణముల కైన నరిది శూరోత్తమ! నీ వురవడి గెలిచితి భాగ్య \| స్ఫురణంబును బాహు బలముఁ బొగడం దగదే?	7
క.	ఆ వృద్ధక్షత్త్రు తపము \| వావిరి నోర్వంగ నీకు వచ్చినటుల దు ర్భావుఁ డగు కర్ణు నోర్వం \| గా వచ్చినఁ గాదె నాకుఁ గడుఁ బ్రీతి యగున్‌!’	8
చ.	అనవుడు నాతఁ డిట్లను ‘మహాత్మ! భవత్కరుణం బ్రతిజ్ఞ యే ను నెఱపఁ గంటిఁ బాండవమనోరథసిద్ధి భవద్దయా సమృ ద్ధి నగుట వింతయే? భవ దధీనులకున్‌ విజయంబు బ్రాఁతె? నీ పను పొనరించు వార; మట భారము నీయది గాదె యెప్పుడున్‌!’	9
తే.	అనుడు నుద్గత మందస్మితాస్యుఁ డగుచు \| దనుజమర్దనుఁ డతనితో ‘ధర్మతనయుఁ గానఁ బోవంగ వలయు భాస్కరుఁడు గ్రుంకు \| చున్నవాఁ’ డని పలికిన నన్నరుండు.	10
వ.	‘అట్లు కాక’ యనుటయుఁ గదిలి, భీమసేనుండును సాత్యకియును యుధామన్యుండును నుత్తమౌజుండును సముచితసల్లాపంబులు సేయుచుఁ దో నేతేర సాంద్ర శోణిత పూర సేకంబున ఘోరంబైన సంగ్రామ తలంబునం జని చని శౌరి సవ్యసాచి నాలోకించి.	11
చ.	‘కరులు రథంబు లశ్వములు కాలుబలంబు చమూపతుల్‌ మహీ శ్వరు లఖిలాస్త్ర శస్త్రములు చామరముల్‌ గొడుగుల్‌ సిడంబు లా భరణము లిత్తెఱంగునను బార్థ! కడుం జెలువొందెఁ జూడ సం గరమహి చిత్ర వస్త్రమునఁ గప్పిన చందముఁ దోఁపఁ జేయుచున్‌.	12
వ.	భవదీయ బాహావిహారంబు నుదారత్వం బిట్లుండునే?’ యని యగ్గించుచు నరిగి సమయోచితం బగుటయును ప్రతియోధులు ఱిచ్చవడియునికిం జేసియు సమరంబు సాలించి తమరాక కెదురు చూచుచుం గూడికొని యున్న యుధిష్ఠిరాదుల సమీపంబగుటయుం బాంచజన్యంబు పూరించినం బాండవాగ్రజుండు.	13