ఆంధ్రభారతి - నారాయణ తీర్థ - నారాయణతీర్థ తరంగములు

చతుర్థ తరంగం (శ్రీకృష్ణగోపాల వర్ణనం)
శ్లో.	గీయతే రామకృష్ణాభ్యాం కృతం గోపాలనం తతః నందాద్యాగమనం పూర్వం తత శ్చ బలకృష్ణయోః॥	1
శ్లో.	కాళీయమర్దనం నాగపత్నీస్తోత్రం తతః పరం ఖరాసురవధ శ్చాథ ప్రలంబస్య చ మర్దనం దావాగ్నిభక్షణం బాలస్తుతి రత్ర నిగద్యతే॥	2
అథ నందస్యాగమనమ్‌।

కీర్తన

సౌరాష్ట్ర - ఆది
గోపైరనుగతో నిత్యం	గోబృందాని విచారయ\న్‌
గోపాలకస్వామీ నంద	గోపో మహా\న్‌ విరాజతే॥

04.01

అథ బలభద్రస్యాగమనమ్‌।

కీర్తన

సౌరాష్ట్ర - ఆది
హలీ బలీ చ ముసలీ	లలితాంగదకుండలీ
నీలాంబరీ శ్వేతరూపీ	బలభద్రో విరాజతే॥

04.02

అథ శ్రీకృష్ణాగమనమ్‌।

కీర్తన

నాదనామక్రియ - ఆది
శంఖీ చక్రీ గదీ పద్మీ	శార్ఙ్గీ కిరీటకుండలీ
శ్రీవత్స కౌస్తుభీ దివ్య	పీతాంబరో విరాజతే॥

04.03

కీర్తన

నాదనామక్రియ - చాపు
పల్లవి:	పాహి పాహి జగన్మోహన -కృష్ణ	పరమానంద శ్రీకృష్ణ॥
చరణ (1):	దేవకీవసుదేవనందన - కృష్ణ	దివ్యసుందర శ్రీకృష్ణ॥
	నందయశోదానందన - కృష్ణ	ఇందువదన శ్రీకృష్ణ॥
	కుందరవదనకుటిలాలక - కృష్ణ	మందస్మిత శ్రీకృష్ణ॥
	కింకిణిరచితఘణంఘణ - కృష్ణ	క్రీడాలోల శ్రీకృష్ణ॥
	కుంకుమపంకవిపంకిల - కృష్ణ	గూఢమహిమ శ్రీకృష్ణ॥
	చంచలఝళఝళనూపుర - కృష్ణ	మంజుళవేష శ్రీకృష్ణ॥
	తరళితకుండలమండిత - కృష్ణ	తాండవలోల శ్రీకృష్ణ॥
	ధిక్కృతసురరిపుమండల - కృష్ణ	దీనపాలక శ్రీకృష్ణ॥
	సాధుసాధు నటవేష - కృష్ణ	సత్యసంధ శ్రీకృష్ణ॥
	పాలితనారాయణతీర్థ - కృష్ణ	పరమపావన శ్రీకృష్ణ॥

04.04

గద్య.

అథ కదాచిదేతౌ నందకుమారౌ నిర్మలనిరుపమ రజతాంజన
శిఖరి శిఖర సముత్తుంగ దివ్యమంగళ సుందరాంగౌ - దుర్వినయ
దుర్వీర్య గర్వపర్వత విషయవిపిన సంచారి మహాసురమత్త
మాతంగ మహోదార కేసరిణౌ - సంతతసముల్లసిత కమల
కుశేశయ కుముద కల్హారాది కుసుమ సౌరభ్య సౌభాగ్య
భోగ సమున్మిష దానందానుభవ దివ్యదర్శనైః హంస
కారండవ సారస చక్రవాకాది వివిధ విహంగమై రనుదిన
ముదిత మహోత్సాహ సాహస సమృద్ధ సముచ్ఛృంఖల
కలరవావబోధిత నిజానందావధీరిత బ్రహ్మలోకాది సుఖై
ర్నిజతట సమాగత సుర విటపి బృందైశ్చ సంతత
పరిశోభమానాయాః కాళింద్యాస్తటభువి పర్యటంతౌ -
కరతల కలిత వేణు విషాణ వేత్రౌ - నిరవధిక కృపావలోకన
హాస పరిహాస విలాసై ర్నిజ పరిజనా - నానందయంతౌ - సకలలోక
పాలకా విహ గోపాలౌ బభూవతుః। తేచ గోపబాలాః తదీయ
విలాసాపన్న సుధారస మాకంఠ మాపీ యాత్యంత తృప్తతయా
సముద్గిరంత ఇవ భగవదనుగ్రహ ప్రతిబోధిత సకల
కలా స్తదీయ కల్యాణ గుణగణా నిత్థం గాయంతో వనభువి
సుఖం చేరుః।

కీర్తన

మధ్యమావతి - ఆది
పల్లవి:	కలయ వనభువి కామగతిం - కలభగమన మఖిలాత్మరతిమ్‌॥
చరణ (1):	రజతశైల శిఖరోపమకాయం - రమణీయమిహ రామనామధేయం
	సకలజలదరుచిరం గతమాయం - సకలవల్లవీజన భాగధేయమ్‌॥
చరణ (2):	లలితతర మురళీనాదవినోదం - లావణ్యరసపూర సరిదాస్పదం
	అళికులమిళిత తుళసీబృందమోదం - ఆనందనటన సుందరపాదమ్‌॥
చరణ (3):	దివ్యత్రిభంగి లలితతర గాత్రం - దేవాది విరచిత నుతిపాత్రం
	భవ్య కరకమల కమనీయ వేత్రం - భాస్కరకోటి ప్రభంజన మిత్రమ్‌॥
చరణ (4):	సకృదవలోకనకృత జగదండం - సరస కుండల శోభి మృదుగండం
	ప్రకటిత బ్రహ్మాండ శతకోటితుండం - ప్రాకృతాసుర తిమిర మార్తాండమ్‌॥
చరణ (5):	రవితనయాతట సుఘటిత ఖేలం - రక్షిత సకల గోకులబాలం
	నవరస పరిపూర్ణ గానవిలోలం - నారాయణతీర్థ గీత సులీలమ్‌॥

04.05

శ్లో.	గోవిందానుచరా స్సర్వే గోవిందాసక్తచేతసః గోవింద మనుగాయంతో సానందం ననృతు ర్వనే॥	4
శ్లో.	వినా తు బలభద్రేణ కృష్ణో గోపాలకై స్సహ కాళీయస్య హ్రదం గత్వా న్యపతత్‌ తజ్జలే బలాత్‌॥	5
శ్లో.	కాళీయ స్తద్ధ్వనిం శ్రుత్వా క్రోధసంరక్తలోచనః బబంధ కృష్ణం భోగేన దదృశుస్తం వ్రజౌకసః॥	6
శ్లో.	పశ్యత్సునందాదిషు గోపికాసు శ్రీకృష్ణమేవాఖిలమిత్రభూతం తుష్టావరామ స్సకలాత్మదర్శీ సర్వాత్మకం కృష్ణ మనన్య దృష్ట్యా॥	7

కీర్తన

కర్ణాటసారంగ - ఆట
పల్లవి:	బంధనా న్మోచయ - కాళీయకృత - బంధనా న్మోచయ॥
అనుపల్లవి:	బంధనాన్మోచ యాత్మాన మనుపమ
	బలమనుస్మర తావక మధునా॥
చరణ (1):	కారణం జగతా మఘౌఘ వి-దారణంహి భవా\న్‌
	దురితాశేషశోకమహిభార
	వారణాయ కృతమానుషవేష శ్రీకృష్ణ॥
చరణ (2):	బాలచాపలతయా తవానఘ-లీలయాల మిహ
	కాళియవిష మాశు వినాశయ
	కలయ గోకులకల్యాణ మథ భో॥
చరణ (3):	నందగోపమహిషీ తవేయ మ నందినీ జననీ
	నంద మేన మానందయ తా మపి
	నందనందన సుందర శ్రీకృష్ణ॥
చరణ (4):	కృష్ణతత్త్వవిదాగీత మితి - వృష్ణిజనముదే
	విష్ణుభక్తశివనారాయణతీర్థ
	విరచితం విపులానంద ముదితమ్‌॥

04.06

శ్లో.	రౌహిణేయకృతం గీతం శ్రుత్వాస్ఫాట్య చ కాళియం పాతయిత్వా జలే నృత్య మకరోత్తస్య మూర్ధని॥	8
అథ నాగపత్నీనా మాగమనమ్‌।

కీర్తన

నాదనామక్రియ - ఆది
ఆయాతి నాగదారకదంబం ప్రతి	మాయాకలితలోకకదంబం
నందాదియోగిబృందచింత్యపాదం పరమా	నందైకకంద మాశ్రితవేదం
ఫణిఫణాసమర్పితపాదారవిందం నిత్య	మణిమాదిభూతిద మఖండితానందం
కమనీయకాలమేఘాభిరామం గోప	కామినీబృందకలితకామం
నానావిచిత్రలీలావినోదం శ్రీ	నారాయణతీర్థభయవరదమ్‌॥

04.07

శ్లో.

ఫణేషు తస్య నృత్యంతం క్షీనశక్తే ర్ముహు ర్ముహుః
భర్తృభిక్షాం ప్రార్థయంత్యో నాగపత్న్యో జగుర్హరిమ్‌॥

కీర్తన

ముఖారి - ఆది
పల్లవి:	దేవ కురు శిక్షాం	దేహి పతిభిక్షాం॥
అనుపల్లవి:	దీనపరిపాలనాయ	స్వీకురు దీక్షాం॥
చరణ (1):	ఆగమైకశరణ	మశేషలోకకారణం
	ఆహు రాగమేన తత్త్వా	మానంద మఖండితం॥
చరణ (2):	యోగిమతిభూషణా	ఘౌఘ పరిశోషణ
	భోగిశయన భువన	భూషపాహి పతితం॥
చరణ (3):	జాతికులశరణ మ	శేషజంతుతారణం
	జాతం భవతాకృత	మిత్యాగమవిదితం॥
చరణ (4):	సర్వజంతుసమతా	సాధు తవ విదితా
	సర్వబుద్ధిషు ప్రహితా	సా చ వేదవిదితా॥
చరణ (5):	అజ్ఞాతవస్తు కి	మస్తి విజ్ఞానస్య తే
	అజ్ఞాపయ యదుచిత	మస్మాకం జగత్ప్రభో॥
చరణ (6):	నాగపత్నీగీతమిదం	నారాయణచరితం
	యోగివరనారాయణ	తీర్థయతిఫణితమ్‌॥

04.08

శ్లో.	ఏవం స్తుతే జగన్నాథే నాగపత్నీభిరాదరాత్‌ నమస్తే దేవదేవేతి ఫణీ ప్రాహ శనై శ్శనైః॥	10
శ్లో.	శ్రీకృష్ణస్తం పరిత్యజ్య సాగరం గచ్ఛ నిర్భయః మత్పాదచిహ్నితఫణై రిత్యుక్త్వా గోకులం యయౌ॥	11
శ్లో.	పరం గోపబాలై ర్మహత్తాళబృందం క్రమేణ ప్రవిష్టౌ ఖలా\న్‌ సంహరంతౌ ముదా రామకృష్ణౌ సఖేలం చరంతౌ ఫలైస్తోషయామాసతు ర్గోపబాలాన్‌॥	12
శ్లో.	ఖరాసురవధం కృత్వా ఖగాధిపతివాహనః నిరాయాసః పరానందో రమతే నందనందనః॥	13
గద్య.	తమేవ మసురకులకదళీవనోన్మూలనకేళికలాకుశల కలభ మూర్తిధరం నందకుమారం సర్వేచ గోపబాలాః సంపూర్ణ మనోరథా ఇత్థం ప్రార్థయామాసుః।	14

కీర్తన

కాంభోజి - త్రిపుట
పల్లవి:	రామ సఖే కృష్ణ సఖే	రమణీయ గోకులమథయామో॥
చరణ (1):	కమలబంధురిహ కమలమనుపతతి	కమలినీ మలినేన విభాతి
	కుముదబంధురపి కుముదమనుసరతి	కుముదినీచ పరంపరి హసతి॥
చరణ (2):	శశధరం శనకై రనుపశ్యతి	శర్వరీ వనితా నిజకాంతం
	వశముపైతి వనితాఝషబృందం	వామమన్మథ దాశస్యమందమ్‌॥
చరణ (3):	అళికులం కమలోదరమిళితం	అలఘుగీతరసామృతభరితం
	కలయ గోధనమిహ సముదితం	లలితవేణురవేణ త్వరితమ్‌॥
చరణ (4):	రక్తచందనలేపనలోలా	రాగిణీ పశ్చిమాభాతిబాలా
	ముక్త లజ్జేవ ముహు రతి చపలా	ముంచతి వీటికా రస మబలా॥
చరణ (5):	చక్రవాకయుగళంచ విగళితం	చారునీర నిరంతరమిళితం
	వక్రకంఠవిగళితరవ లలితం	వనబృంద మధునైవ ముకుళితమ్‌॥
చరణ (6):	వారుణీసేవనా దబ్జమిత్రం	వారుణోనీతవాన్నిజగాత్రం
	తారకామలనిజదంతకాంత్యా	తామసీ హసతీతి విచిత్రమ్‌॥
చరణ (7):	శృణ్వతా గోపబాలకగీతం	శ్రీధరేణ గోకులమాయాతం
	తృణచరానుసరేణ సముదితం	ధీరనారాయణతీర్థసుఫణితమ్‌॥

04.09

శ్లో.	ఉషిత్వా గోకులే రాత్రౌ బలేన సహితః సుఖీ ఉషస్యుత్థాయ గోవింద శ్చోదయామాస గా వనమ్‌॥	15
శ్లో.	అద్య భాండీరకం నామ వనం యామౌ వయం ముదా ఇత్యాహ భగవా న్బాలా\న్‌ బలం చ బలినాం వరమ్‌॥	16

కీర్తన

సావేరీ - ఆది
పల్లవి:	రామ రామ విచరామో వయం	రమ్య భాండీరక వన మధునా॥
అనుపల్లవి:	రామ రవికిరణదూరం	రమణీయ సరోవర బహుళమ్‌॥
చరణ (1):	చంద్రకాంతోపల మణివాలుక	చారుతరఝరీసుందరసలిలం
	చందన చంపక తరు మందార	ఛాయాతిమిర సూర్య మణిజాలమ్‌॥
చరణ (2):	ఉన్నత తరుషు సమున్నత బలవ	త్పన్నగ రిపుముఖనిహ్నుత విహగాః
	ఉన్మత్తా ఇవ సన్నద్ధా యుధి	మన్యంతే ముహురిహ ఖలు యోద్ధుమ్‌॥
చరణ (3):	నందనం వన మేత దుపమితం	నానారసఫలైరపి మధుసుధయా
	మందమారుత స్పందనవిగళిత	మందారాది శ్రీచందన కుసుమైః॥
చరణ (4):	ముక్తాఫల సమముద్రితవల్లీ	నక్తమధువ్రత శంసితవిభవం
	త్యక్తాశంసద్దివి వనమేతత్‌	చేతస్పృహయతి దివ్యవధూనామ్‌॥
చరణ (5):	స్వర్గారోహణసోపానపంక్తిరివ	సురలోకావధి సుందర విటపం
	నిర్గళితోపమ మతిరమణీయం	నిహ్నుత సకల సంతాప విభూతిమ్‌॥
చరణ (6):	బంధుప్రియ ఇవ బంధూనయమిహ	సంధత్తే ఖలు సాదర మస్మా\న్‌
	మందస్మేర సుధా మధు సేచన	మంగళపూర్వమహోవనదేశః॥
చరణ (7):	నారాయణఫణితం రమణీయం	ధీరోదాత్తగిరా బలభద్రం
	ఘోరాఘౌఘ నివారణమేత	న్నారాయణతీర్థార్య సుఘటితమ్‌॥

04.10

శ్లో.	గాయ\న్‌ గాయ\న్‌ వనభువి శనైర్గోపబాలై స్సమేతో దేయం దేయం కరతల మితి ప్రీతిత స్తాడయం స్తత్‌ పాయం పాయం సరసవచనాహ్లాద పీయూషధారాం సోఽయం మాయీ విహరతి ముహుర్నాదయన్వేణుమీశః॥	17
శ్లో.	క్రీడా మారబ్ధవా\న్‌ కృష్ణో జయశీలా\న్‌ పరాజితాః స్కంధే వహంతి యస్యాంతాం బాలకైస్సహ సంభ్రమాత్‌॥	18
శ్లో.	ప్రలంబో నామ గోపాలవేషధారీ మహాసురః పరాజితో రౌహిణేయం స్కంధేనోఢ్వా పలాయితః॥	19
శ్లో.	సంకేతస్థాన ముల్లంఘ్య పలాయనపరో బలః మాం నయత్వేష కిం కార్యం వద కృష్ణేత్యభాషత॥	20
శ్లో.	వీర్య మావేదయ\న్‌ కృష్ణో బలభద్రస్య ధీమతః ఇద మాహ మహావీర్య మార్యం బలసమున్నతమ్‌॥	21

కీర్తన

కాపీ - ఆట
పల్లవి:	తావకం పరభావ మనుస్మర - తారకం స్మరతామ్‌॥
అనుపల్లవి:	సేవక సంకల్పసిద్ధతనో పర - దైవత నరభావభావనయాలమ్‌॥
చరణ (1):	స్మర తవాతులబల మతివీర్యం సాహ - సం చ బలభద్ర గాంభీర్యం
	నగవపుర్ధర మసుర మిమం జహి - నరవరాధికధైర్య దుర్వీర్యమ్‌॥
చరణ (2):	ఖేలనే సమయో నామ మిహ బల - నీలాంబర తవ భో
	తాలనికేతన తాడయ కుటిలం తవ - ఖేలనమిత్రమమరశత్రు భృత్యమ్‌॥
చరణ (3):	అఘటితం ఘటయతి తవ మాయా - అఖిలలోక జననీ
	విఘటిత భవబంధమూలమోహ నిబద్ధ - విపుల బోధానందరసఘన జయ భో॥
చరణ (4):	లోకబంధుఫణిత మేత దాశ్రిత - శోకమూలహరణం
	భక్తసంసిద్ధిసాధక శ్రీహరి - భక్త నారాయణతీర్థభరణమ్‌॥

04.11

శ్లో.	జఘాన బలభద్రస్తం శ్రీకృష్ణేన ప్రచోదితః ప్రలంబం ముష్టినా మూర్ధ్ని ప్రలంబోఽపి పపాత చ॥	22
శ్లో.	అఘాసుర బకాసుర ప్రముఖ కంస దూతాసురాః హతాస్తు హరిణా గుణవ్యతికర ప్రసూతాః ఖలాః వనే విచరతాఘనే వకుళమంజరీపుంజకే ప్రవన్మధుఝరీచరద్భ్రమరకామవిద్యాగురౌ॥	23
శ్లో.	దృష్ట్వా దావానలం బాలాః కృష్ణ కృష్ణేతి చుక్రుశుః గృహీత్వాఽంజలినా కృష్ణో దావానలమభక్షయత్‌॥	24
శ్లో.	జీర్ణో దావానలో యస్య జాఠరేణ మహాత్మనః బాలాస్తమస్తువ\న్‌ కృష్ణం వేదాంతైర్యస్తు లక్ష్యతే॥	25
శ్లో.	శ్రీగోపాలకమేకమేవ పరమం దైవం సదా మానయే శ్రీవత్సాంకితవక్షసం శ్రితజనాధారం సమారాధయే ఆమ్నాయాంత సరోజహంస మఖిలానందాత్మకం శాశ్వతం కుక్షిస్థాఖిలలోకరక్షకమముం గీర్వాణగేయం ప్రభుమ్‌॥	26

కీర్తన

కాంభోజి - ఆది
పల్లవి:	శ్రీ గోపాలక మేవ దైవతం హృదయే॥
అనుపల్లవి:	ఆగమారవింద బృందహంస మాకలయే॥
చరణ (1):	సర్వలోకైకశరణ్య చరణారవిందం
	దుర్వినీతమదభంగ దోర్దండబృందం
	నిర్విశేష నిరంతర నిర్మలానందం
	గీర్వాణగంధర్వకోటి గీతగోవిందమ్‌॥
చరణ (2):	నిజజన స్వర్గాపవర్గ నిత్యదాతారం
	అజ మవ్యయ మాదిదేవ మనుపమాచారం
	విజయసారథి మశేషవిదుషా మాధారం
	భుజబలనిర్జిత వైరిభూపాలశూరమ్‌॥
చరణ (3):	లక్షితసర్వభువనలక్షణ మేకం
	పక్షి రాజవాహనం విపక్షశిక్షకం
	కుక్షిగతజగదండకోటిధారకం
	అక్షీణగోకులనివాస లక్ష్మీనాయకమ్‌॥
చరణ (4):	నారదాదిమునిగేయ నామధేయకం
	నామరూపనిర్వాహక మామ్నాయమానకం
	వారిజాసనాది వినుత వారితశోకం
	నారాయణానంద తీర్థానందదాయకమ్‌॥

04.12

శ్లో.	ఇత్థం గోపాలకైర్గీతో భగవా\న్‌ భక్తకామదః గోభి ర్గోపాలకైః కృష్ణో గోకులం పున రాగతః॥	27
ఇతి శ్రీనారాయణతీర్థవిరచితాయాం శ్రీకృష్ణలీలాతరంగిణ్యాం శ్రీకృష్ణగోపాలవర్ణనంనామ చతుర్థతరంగః॥