ఆంధ్రభారతి - నారాయణ తీర్థ - నారాయణతీర్థ తరంగములు

దశమ తరంగం (కంసనిర్హరణం)
శ్లో.	శ్రీకృష్ణచరితం కంసవధాఖ్య మభినీయతే కంసస్యాగమనం పూర్వం దేవకీవసుదేవయోః॥	1
శ్లో.	మధురానగరీవీథ్యాం రజకాదే ర్వినిగ్రహః కుబ్జాద్యనుగ్రహశ్చాథ మల్లమాతంగమర్దనమ్‌॥	2
శ్లో.	కంసాసురవధ శ్చాథ పిత్రోర్దర్శన మాదరాత్‌ సంగ్రహోఽయం చరిత్రేఽస్మి\న్‌ కథితః సావధానతః॥	3
గద్య.	తౌఖలు రామకృష్ణౌ - స్ఫుటతర నీలపీతసుందర పరిధానౌ - మధ్య భాగ సమభివ్యక్త సరస్వతీ విలసితాసిత సరిద్వర సంయోగ సముల్లసిత విచిత్ర కాంతి తిరస్కరణ ప్రవీణౌ - సత్పథ పథిక పరిశ్రాంతి విరామ రమణీయ మునివర మనోహంసశ్రేణీ సమాశ్రయ కర చరణ వదన నయన నాభి సరసీరుహ సంపత్సరిద్వర కాంతి కాయౌ - తుంగ ప్రాసాద శృంగ సంగత చంద్రకాంతిమణిగణ శశాంక సంయోగ సముద్గళిత లలితతరామృత సంసిక్త రమణీయ సైకత మధురా రాజమార్గ గామినౌ - విచిత్ర వనమాలినౌ - మానినీ జనమోహనౌ - సరళమురళీ గీతసుధా సముద్బోధిత సురకిన్నరాది వరవనితా మనోమయ రాజహంసగణౌ - సత్యకామాదిగుణౌ - సకలలోక సంరక్షణ ప్రవీణౌ - మధురాపురనివాసి భాగ్యపరిపాక విశేషలక్షణౌ - సురనగరీ నారీ గురుతరగీత సుధా సమారాధనానందితౌ - దుర్మద మద విభంగ తుంగ ధైర్య వీర్య గంభీర్య భావౌ - పరిహృత గోపకుమారభావౌ - మహానుభావౌ - దృష్ట్వా ముహుర్ముహుః సంతుష్టా స్తత్ర జనా బభూవుః॥	4
శ్లో.	ఆయాంతం రాజమార్గేణ మధురాపురయోషితః ఆశ్చర్యరూపసంపన్న మాశ్చర్యం సబలం జగుః॥	5

కీర్తన

యదుకులకాంభోజి(ఆనందభైరవి) - ఆది
పల్లవి:	నందనందనం నిజభక్త	చందన మాకలయ॥
చరణ (1):	నందాదిమునీంద్ర భావ్యా	నంద మాళి కలయ॥
	సుందరాననచంద్రశ్రీ	మందిర మాకలయ॥
	శృంగారరసప్రవాహ	శ్రీనిధి మాకలయ॥
	భ్రూభంగకటాక్షలక్ష్య	భూరికరుణ మాకలయ॥
	సర్వలావణ్యతటినీ	సాగర మాకలయ॥
	కలభసుందరగమన	కలితలలిత మాకలయ॥
	పరిజనరక్షణబద్ధ	పరికర మాకలయ॥
	విజయగోపాల మతుల	విఖ్యాత మాకలయ॥
	బలభద్రభద్రదబాహు	బంధ మి హాకలయ॥
	మధురామానినీజన	మనసిజ మాకలయ॥
	శివనారాయణతీర్థ సేవ్య	దివ్యపద మాకలయ॥

10.01

శ్లో.	హరంతం రాజవస్త్రాణి చరంతం చారుదర్శనం నిరంతరపరానందసరసం కలయాళి తమ్‌॥	6
అథ రజకనిగ్రహో వస్త్రాపహారశ్చ మాలాకారానుగ్రహః కుబ్జాగమనమ్‌।

కీర్తన

నాదనామక్రియ - ఆది
కుబ్జా సమాయాతి గోవిందచిత్తా	అబ్జయోనిచాతుర్యసర్వస్వభూతా
ఉజ్జ్వల విచిత్ర భూషణోజ్జ్వల	కజ్జలనేత్ర శోభిత
కస్తూరి ఫాలాకరధృత - కస్తూరి చందనాది సంభారా॥

10.02

శ్లో.

క్వాపి కుబ్జాం సునేత్రాబ్జామబ్జనాభో విలోక్య తాం
ప్రాతిలోమ్యగిరాం సారైః ప్రహసన్నిదమాహ సః॥

కీర్తన

పంతువరాళి - ఆట
పల్లవి:	కామమోహిని కథయ కిన్ను నామ తే పదమ్‌॥
అనుపల్లవి:	కోమలాధర కరపాద పల్లవ
	కుముదబంధువదన కుంతలజాలే॥
చరణ (1):	తన్వంగి తావకతనురియమార్జవ
	మతివహతిసుతరామానందకారిణి
	అన్వహమభినవ యౌవనఘనవన
	మాచరసి భువన జనమనోహారిణీ॥
చరణ (2):	చందనమృగనాభిచంపకాదికుసుమ
	గంధసుగంధిత గగనదిఙ్మండలే
	కందర్పరథిరథకల్పితశుభగాత్రి
	కలహంసభాషిణికల్యాణశీలే॥
చరణ (3):	తవరూపమన్వర్థనామవిదితమిహ
	భువి పౌరజానపదైరపి విపులం
	శివనారాయణతీర్థశివగీతమిదమిహ
	భవభయభంజన మభయదమతులమ్‌॥

10.03

శ్లో.

హసంతం వదంతం సమీపే వసంతం
ముహుస్సంస్మరంతం తపః ప్రాక్తనం తత్‌
పరప్రేమభక్త్యా ప్రభుం ప్రార్థయంతీ
స్వయం ప్రాహ చేదం వచ స్సాధు కుబ్జా॥

కీర్తన

సౌరాష్ట్ర - ఆట
పల్లవి:	ఏహి ఏహి విజయగోపాలబాల
	పాహీహ మాం పాలయ లోకపాల॥
చరణ (1):	భువనసుందర చారువదనాబ్జ	భూరికృపాలయభూమాభిధాన
	సవితృమండలకోటిభాస	సంసృతి దృఢపాశబంధవిదళన॥
చరణ (2):	గోపరమణిజారరమణ	గోవిందగుణమణిగణవరాభరణ
	పాపాసురబృందనిర్హరణ	పరమపావనచరిత పాతకహరణ॥
చరణ (3):	గంధమాల్యాది గృహాణ	గళితభవ ఫణీంద్రగరుడవిహరణ
	సుందరమమదేహిసురతమిహ	సుఖయ మామిహ దేవ మమ భవశరణమ్‌॥
చరణ (4):	కలితకస్తూరికాతిలక	కరధృతమురళీకలనాదరసిక
	బలజితసురవైరినివహ	బద్ధమాయూరపింఛ వనజాభనయన॥
చరణ (5):	పరిపూర్ణానందసముద్ర	పాపమహాటవీపావకరౌద్ర
	పరిజనకృతబహుభద్ర	వరనారాయణతీర్థధృతబోధముద్ర॥

10.04

శ్లో.	సర్వాంగసౌందర్య సుధాపగాయా మపారసంసార విశోధికాయాం కంసద్విషస్తస్య సుఖం చరంతీ కుబ్జామనోవృత్తి రతన్నివృత్తా॥	9
శ్లో.	ఆకర్ణ్య కుబ్జావచన మాశ్చర్యం తామనిందితాం అకరో త్కరసంస్పర్శా దమరీం సుందరీం హరిః॥	10
శ్లో.	రిరంసయా తేన సాకం కుబ్జా సా కామమోహితా పీతాంబరధరం శ్యామం మధురం ప్రాహ మాధవమ్‌॥	11

కీర్తన

కాపి(భైరవి) - ఆట
పల్లవి:	మాధవ మే రతిం దేహి	నాథనాథమాధవ మే రతిం దేహి॥
అనుపల్లవి:	మధురాధరబింబ ధన్యేయం	మాననీయా త్వయా నూనమ్‌॥
చరణ (1):	దీనజనదయాఘన	దేవకీవరనందన
	మానినీమానభంజన	మదనమదన
	మునిమనోనికేతన	మోహతిమిరనిధన
	కనకమయపరిధాన	కలితనిఖిలభువన॥
చరణ (2):	న త్యజామి చేలాంచలం	నాథ తవ సురతిమూలం
	అతినీలఘనసుందరం	ఆనందలీలం
	సత్య మాశాస్మి గోపాలం	సత్యకామాదిగుణజలం
	భృత్యవర్గపరిపాలం	బలభద్రానుజం బాలమ్‌॥
చరణ (3):	తరణికోటికిరణ	తామసగుణనిర్హరణ
	తారకముక్తాభరణ	దాసపోషణ
	దూరితదుర్జనగణ	దోషరహితచరణ
	నరనారాయణతీర్థ	వర్ణితనిజచరణ॥

10.05

శ్లో.	ప్రార్థిత స్త్వనయా కృష్ణస్తాం సమాధాయ సత్వరం బలాత్కువలయాపీడం కుంజరం నిజఘాన సః॥	12
శ్లో.	హత్వా ముష్టికచాణూరౌ ధనుర్భంగం విధాయ చ సాగ్రజో మాతులసభాం ప్రవిష్టో గీయతేఽమరైః॥	13

కీర్తన

శంకరాభరణం - ఆట
పల్లవి:	అవలోకయత శ్రీగోవిందం	భో భో భూమావవలోకయత॥
అనుపల్లవి:	నవజలధరశ్యామం	నందితబలరామమ్‌॥
చరణ (1):	భువనసుందరాకారం	భూరికరుణాకరం
	అవనీభారసు	రారివిదారం
	నవముక్తామణిహారం	నానావిధవిహారం
	ధ్రువపదవిధాతారం	దూరితసంసారభారమ్‌॥
చరణ (2):	మల్లచాణూరమథనం	మత్తమాతంగనిధనం
	ఫుల్లపంకజదళ	సన్నిభనయనం
	వల్లవాంగనామదనం	వాసుదేవాభిధానం
	కల్లోలమాలిశయనం	కంసేభ కేసరిణం॥
చరణ (3):	ఏకాంతదైవతం	యాదవాబ్ధిసముదితం
	శ్రీకాకుళనగరీ	శ్రీభూమిసహితం
	నాకవల్లభగీతం	నారాయణతీర్థరచితం
	వికటమోహరహితం	విజయగోపాల మసితమ్‌॥

10.06

శ్లో.	అవరుహ్యాసనాద్వీరః కంసో రంగగతః ఖలః యుద్ధాయ సహ కృష్ణేన స్మర\న్‌ ప్రాగ్దేవ భాషితమ్‌॥	14
శ్లో.	హతః కంసారిణా కంసః సంసారభయహారిణా శౌరిణా హరిణా యుద్ధే జగుస్తం సురభూసురాః॥	15

గానం: శ్రీ ఆకొండి శ్రీనివాస రాజారావు, కాకినాడ.

కీర్తన

సురటి(భూపాళ) - ఆట
పల్లవి:	పాహి పాహి మాం పరమకృపాళో
	దేహిమే త్వయి దేవసుభక్తిమ్‌॥
చరణ (1):	అసురసంహార శ్రీవిజయగోపాల
	అమరసంరక్షణ విజయగోపాల
	వసుదేవతనయ శ్రీవిజయగోపాల
	వాసవాదినుత విజయగోపాల॥
చరణ (2):	సంగీతలోల శ్రీవిజయగోపాల
	సద్గుణశీల శ్రీవిజయగోపాల
	శృంగారరసపూర విజయగోపాల
	శ్రితజనపాల శ్రీవిజయగోపాల॥
చరణ (3):	ధీరగుణాధార విజయగోపాల
	ధేనుకాదిహరణ విజయగోపాల
	నారదమునిగేయ విజయగోపాల
	నారాయణతీర్థ విజయగోపాల॥

10.07

శ్లో.	మధురాయాం హతే కంసే మాధవేన మహాత్మనా వవృషుః పారిజాతాది పుష్పాణ్యాకాశతస్సురాః॥	16
శ్లో.	అనంతకల్యాణగుణాభిరామౌ దురంత సంసార తమోవిరామౌ నిరంతరం సంస్మరతోః స్వపిత్రో రథాంతికం సమ్యగవాప్తవంతౌ॥	17
శ్లో.	పరిష్వజ్యాంకమారోప్య మూర్ధ్న్యుపాఘ్రాయ సారదం దేవకీవసుదేవౌ తావాశిషం చక్రతు ర్ముదా॥	18
శ్లో.	జగతీపతిరపి భగవా\న్‌ యదుపతిబంధుస్సుబంధురఖిలాత్మా హరి రథ మధురానగరీ నరపతి మానందయ\న్‌ సతత్రాస్తే॥	19
ఇతి శ్రీనారాయణతీర్థవిరచితాయాం శ్రీకృష్ణలీలాతరంగిణ్యాం కంసనిర్హరణం నామ దశమ తరంగః.