ఆంధ్రభారతి - తూము నరసింహదాసు కీర్తనలు - రామనామామృతమే నీకు

గానం: శ్రీ ఆకొండి శ్రీనివాస రాజారావు, కాకినాడ.

కీరవాణి - ఆది / మధ్యమావతి - ఆట

పల్లవి:

రామనామామృతమే నీకు - రక్షకం బనుకోవె మనసా
కామక్రోధ లోభాదులను - ఖండించు నీనామమహిమ

చరణము(లు):

తల్లి తండ్రి యెవరు నీవు - తర్లిపోవువేళ రారు
యెల్ల బాంధవులు చుట్టాలు - యేమిగతి కల్పింపలేరు

ధనమదెంత కలిగియున్న - తనతోడుత తగిలిరాదు
తనయు లెంద రున్నఁగాని - తనవిధిఁ దప్పింపలేరు

నేరిచి నేరక సేయు - నిత్యకృత్యవిధులు నేడు
సారసాక్షున కర్పించి - నారసింహదాసునిఁగూడి