ఆంధ్రభారతి - తూము నరసింహదాసు కీర్తనలు - రామనామమే జీవనము

గానం: శ్రీ ఆకొండి శ్రీనివాస రాజారావు, కాకినాడ.

కమాసు - ఆది / కాంభోజి - ఆట

పల్లవి:

రామనామమే జీవనము - భక్తావనము పతితపావనము

చరణము(లు):

హరిదాసుల జతగూడుదము వారి
ననుదినమును గొనియాడుదము
రఘువరుని సత్కథలెల్ల బాడుదము -
శ్రీధరుని గొల్వనివారి వీడుదము

రాముడె దొరయని పల్కుదము -
యితర రాజసేవకుల యలుకుదము
భక్తి ప్రేమ జనులమీద జిలుకుదము -
భువి పామరులను జూచి యళుకుదము

ఘట మస్థిరమని చాటుదము -
యమ భటుల దూరముననె మాటుదము
యీ చటుల సంసారాబ్ధి దాటుదము -
యొక్క చిటికెనె యఘముల మీటుదము

శేషశాయిగని మ్రొక్కుదము -
రఘు వీరు కథలు విని సొక్కుదము
దుర్విషయాదుల దెగచెక్కుదము -
మరి విబుధాహితుల పొందుఁ దక్కుదము

సిరి సంపదలు విడజిమ్ముదము -
నరసింహావనుని నెద నమ్ముదము
భద్రగిరి నాథునకు దేహ మమ్ముదము -
అనితర యోగమున నుంట నమ్ముదము