ఆంధ్రభారతి - తూము నరసింహదాసు కీర్తనలు - రామ రామా యన నోరు రాదటే

యదుకులకాంభోజి (ఆనందభైరవి) - ఆది

పల్లవి:

రామ రామా యన నోరు రాదటే - ఓ మనసా!
వేమరు రుచులెల్ల గోరుచు - వెఱ్ఱివై తిరిగెదవు గాని

చరణము(లు):

ఎక్కడి తలిదండ్రులూ నీ కెక్కడి యన్నదమ్ములు
యొక్కరైన గూడ రారు వట్టిభ్రమ లింతే గాని

సారము లేనట్టి యీ సంసారము దరింపలేక
పూరి సేయనట్టినరులను - చేరి వేడుకొనెదుగాని

నేను నావా రనుమాట - నిజముగా నెరనమ్మి దురభి
మానివై తిరిగేవు ముక్తి - మార్గ మింతైన గానవు

చక్కని వనితల జూచి నిక్కి విఱ్ఱవీగి యెంతో
మక్కువచే జిక్కి వెఱ్ఱి - మమతల దిరిగెదవు గాని

చేరరాని వారిచెంత జేరి కారుమాటలాడి
యూరక ప్రొద్దు గడపెదు - నారసింహదాసు గూడి