ఆంధ్రభారతి - తూము నరసింహదాసు కీర్తనలు

యదుకులకాంభోజి (కన్నడ) - ఆది

పల్లవి:

కుశలమా భద్రాచల నిలయుడు

అనుపల్లవి:

కుశలమా రవికులు శుభవార్తలు
విశదముగా వినవేడుక గల్గెను

చరణము(లు):

కుశలమా రఘుకులశేఖరునకు
వసుధాత్మజయగు వారిజనేత్రకు

ప్రేమ రావణుని ప్రియసుతు దునిమిన
స్వామి కోవిదుడు సౌమిత్రి కచటను

వనధి దాటి రఘువరుసతిఁ గనుగొని
పని వినివచ్చిన పవనాత్మజునకు

భయముతోడ ద్వార - పాలకులై సుర
చయము కెక్కుగగు జయవిజయులకు

పరమభక్తిగల భావజ్ఞులు శ్రీ
వరుని స్వజనులగు వైష్ణవ నివహము

అరసి రాత్రి పగలనక యూడిగము
వరుసఁజేయు పరివారములకు నెల్ల

జనన మరణములు సరకుగొనక హరి
గనుగొని ధన్యతఁ గను నిజదాసులు

చుట్టుకోవెలల సొంపగుస్వాములు
గట్టుపై వెలసిన ఘనులు నృసింహులు

అందముగా పురి ముందర నెలకొను
సుందరమగు గోవిందరాజులకు

భూజములును వరపుణ్య గౌతమియు
రాజిల్లు నగరము రథగోపురమును

మేలివ్యజనములు మించు ఛత్రములు
చాలుభేరియును సరసనవుపతులును

ఘనతరమగు పరికర యుగ్రాణము
అనువుగ రామకల్యాణమంటపము

తరముగాని సుందరతచేత బహు
విరివి గలుగు గోపురచక్రమునకు

పోకబత్తి మల్లెపూ బొదరిండ్లను
శ్రీకరమగు తులసీ వనములకును

రంగుగ పైడిచెరంగు పుటముగల
అంగజనిభుడగు రంగనికిని బహు

రామనామ మధురామృత సారము
ప్రేమగ్రోలు శ్రీరామలింగునకు

మొనసి దాసులకు మోక్షమిచ్చుటకు
దనరియున్న ద్వాదశి మంటపమును

సంపద లొసగెడు స్వామి సీతయును
యింపొందెడు పవళింపు గృహమునకు

లీల భద్రగిరి నేలు రాఘవు
శాలార్థము కరి హయ చయములకును

తప్పక జనకజ స్థానమునకు కడు
నొప్పగుచుండెడు నుష్ణజలములకు

సారరహిత సంసారపయోనిధి
మీరి దాటుటకు మెలగు నావలును

చెలగి తూము నరసింహదాసునకు
బలుప్రాపగు శ్రీభద్రగిరీశుఁడు