ఆంధ్రభారతి - తూము నరసింహదాసు కీర్తనలు - స్వారి వెడలెను

మధ్యమావతి - ఆది (చాపు)

పల్లవి:

స్వారి వెడలెను - రాముఁడు స్వారి వెడలెను
సారసభవ రుద్రామరు లెల్లను - జేరికొల్వ శృంగారముగా నిదె

చరణము(లు):

కనకకిరీటకాంతి మీర ముంగురులు జార! కస్తూరి తిలక మింపుగులుక
కనుగొనలను కృపఘనముగ చిలుకగ దనరిన చిరునవ్వున సుధ గులుకగ

కంబుకంఠమునందు మంచికౌస్తుభమణి ముదంబున కాంతితోడ మించి
డంబుగ వెడద యురంబున సుమణియుతంబగు భూషణతతి ఘృణులీన

బంగారు చాయ పటముతోడ మేఘాల ప్రభలు శృంగారముగ మేలమాడ
రంగుగ శ్రీపదరాజీవములు చెలంగగ బుధజనసంగతి వెదకుచు

శరచాపములు యిరుకేల గురుతుగ దాల్చి తురగారూఢుడై యింపుమీర
దొరతన మంతయు గురుతుపడగను సరస లక్ష్మణుఁడు సంభాషింపగ

భూరిమహిమ సొంపుమీర భద్రాచల విహారుఁడు వనమునందు జేర
నారసింహదాసావను డితడని కోరి జనములు చేరి కొల్వగను