ఆంధ్రభారతి - తూము నరసింహదాసు కీర్తనలు - చూడరె మీరు సుదతులార

కాంభోజి - ఆట

పల్లవి:

చూడరె మీరు సుదతులార - చూడరె మీరు
భావము నిల్పి చూడరె మీరు - వేడుకలర రామవిభుని యొయ్యారము

చరణము(లు):

స్వారివెడలి స్వామి వేంచేసెను - కోరి కుంకుమరస హారతు లందిచ్చి

కమలముపై మంచుకణములవలె మించి - శ్రమబిందు కణములు చాల మోమున గ్రమ్మె

తాళవృంతములను తరుణులందరు గూడి - వేళచల్లగాను వీచుచు కన్నెత్తి

జారు కురులు కస్తూరి తిలకమును - తీరైన చూపులు దేరి కన్నులనిండ

మీరి భద్రాద్రి విహారుఁడు నేడిదె - నారసింహుని బ్రోవ నాథుఁడై వేంచేసె