ఆంధ్రభారతి - తూము నరసింహదాసు కీర్తనలు - చూచి సేవింతము రారే -శ్రీరాములను

మధ్యమావతి - ఆది

పల్లవి:

చూచి సేవింతము రారే -శ్రీరాములను - జూచి సేవింతము రారే
రాచవాడైన కమలలోచను పదపద్మములు

చరణము(లు):

సీతతోడుత రత్న సింహాసనమందుఁ
జేతో మోదంబుతోడఁ జెలువొందు రామచంద్రుని

రాతి నాతిగఁ జేసి - వాతాత్మజుని మదికిఁ
బ్రీతి నొసగినట్టి - సీతేశు పదపద్మములు

బంగారు మంటపాంతరంగమున ను
ప్పొంగి కూర్చున్న రఘు - పుంగవు పదపద్మములు

సంగతితోడ మౌని పుంగవులెల్ల సత్ప్ర
సంగముసేయ విను - సీతాంగన పదపద్మములు

ఛత్రచామరులు సుమిత్రాత్మజాదు లెల్లఁ
బాత్రలై దశరథ - పుత్రుని పదపద్మములు

రుద్ర ప్రముఖులెల్ల - భద్ర మనుచు గొల్వ
భద్రాచలేశు పదపద్మము లేమఱక

సారసనేత్రు తూము - నారసింహదాసునిఁ
జేరి బ్రోచెడు రఘువీరుని పదపద్మములు