ఆంధ్రభారతి - క్షేత్రయ్య మువ్వ గోపాల పదములు - అక్కరో! యోర్వనివారు సరసుడు గాడని

అఠాణా - త్రిపుట

(నాయిక: పరకీయ - స్వాధీనపతిక)

పల్లవి:

అక్కరో! యోర్వనివారు సరసుడు గాడని - ఆడుకొంటే ఆడుకొనేరు

అను పల్లవి:

మ్రొక్కదగినవాని - ముద్దుమాటలవాని - మువ్వగోపాలసామిని యెవరైనగాని అక్క..

చరణము(లు):

రామ! వానిదలచినప్పుడే - రవిక క్రిక్కిఱిసె గుబ్బ
లేమో రొమ్మెల్ల నిండునే - వాని మాటంటే
నా మనసు పైపై నుండునే - వాని జూచితే
నవనిధుల బ్బినట్టుండునే - యెవరైనగాని అక్క..

ఇంతిరో! వాడిందు వచ్చి - యెలమి కౌగిలించితే
యెంతో బడలిక దీరునే - వశముగాని
కంతు తాపము చల్లారునే - యింతకాదు నా
సంతస మెల్ల చేకూరునే - యెవరైనగాని అక్క..

పూని మువ్వగోపాలుడు - పైని చెయి వేసితే నా
మేన పులక లుప్పతిల్లునే - నా తమిరేచ
వానికే బిరుదుజెల్లునే - వాని గూడిన
మానసమెంతో రంజిల్లునే - యెవ్వరైనగాని అక్క..