ఆంధ్రభారతి - క్షేత్రయ్య మువ్వ గోపాల పదములు - ఎటువంటి స్త్రీల పొందైన హితమై యుండునా? క్షేత్రయ్య పదములు

బిలహరి - ఆది

(నాయిక: స్వీయ - స్వాధీన)

పల్లవి:

ఎటువంటి స్త్రీల పొందైన హితమై యుండునా?

అను పల్లవి:

కుటిలకుంత నా మదిలో - కూరిమితో నుండగ ఎటు..

చరణము(లు):

మనసు మర్మము దెలియ వలసి - మగువల గొందరదెచ్చి
కినిసి ప్రక్క బడద్రోసి - కేరి నవ్వేరు
కనకాంగి నను ఒంపునప్పుడు - కన్నుల నీరు నించుక
వినయోక్తులుగా విన్నవించిన - వితము మరువనీయదు ఎటు..

చెలి ముద్దు పాదములాదిగ - శిరము దనుక చక్కదనము
నలిన సంభవునకు వ - ర్ణన సేయ దరమా?
అలివేణి దూరమైన - ట్లైతే మనసు దూరమా?
వలపున నా తనువా రమణికి - వారకమై యుండగను ఎటు..

చెలువ! మువ్వగోపాలుడైన శ్రీవెంకటరమణా! యని
కిలకిల నగవుల నా యెద గు - బ్బల గుమ్ముచు
కళలంటి పరవశము చేసి - కంతుకేళిన నన్నేలిన
మెతలను దలప నిపుడు నా - మే నెల్ల పులకరించెగా ఎటు..