ఆంధ్రభారతి - క్షేత్రయ్య మువ్వ గోపాల పదములు - మంచి వెన్నెల యిపుడు

భైరవి - త్రిపుట

(నాయిక: పరకీయ - స్వాధీనపతిక)

పల్లవి:

మంచి వెన్నెల యిపుడు - మగువ మనకు

అను పల్లవి:

పంచ బాణుని కేళి - బాగుగా కూడుండ మంచి..

చరణము(లు):

బిగువు కౌగిటిలోన - పికిలి పిట్టల రీతి
బిగిమీర పెనగుచును - చిగురు మోవిని
సొగసుగా నీ మేను - జుమ్మనగ జేసెదను
అగడు సేయక నన్ను - ఆ పనికి లెమ్మనుమీ మంచి..

సన్నజాజులు నీదు - జడ నిండ జుట్టెదను
పన్నీరు గంధంబు - బాగుగా నలది
చెన్ను మీరగ గూడి - చికిలిగా తమిరేచి
నిన్ను మది కరగింతు - నిండు పున్నమి నేడు మంచి..

పలుమారు మువ్వగో - పాల రమ్మని పిలిచి
మొలక నవ్వుల తోను - ముద్దు బెట్టు నిను
నెలకొని సమరతుల - నేర్పుతో నేలెదను
ఎలనాగ! మోహతమ - మెల్ల దీరను నేడు మంచి..