ఆంధ్రభారతి - క్షేత్రయ్య మువ్వ గోపాల పదములు - వేడుకతో నడుచుకొన్న

కాంభోజి - త్రిపుట

(నాయిక: సామాన్య - స్వాధీనపతిక)

పల్లవి:

వేడుకతో నడుచుకొన్న - విటరాయడే!

అను పల్లవి:

ఏడుమూడు తరములనుండి - ఇందున్న కాణాచట
కూడుకొని మా మువ్వ గోపాలుడౌ విభుడు వేడు..

చరణము(లు):

మధుర తిరుమలేంద్రుడు - మంచి బహుమానమొసగి
ఎదుట గూర్చుండు మని - యెన్నిక యిమ్మనెనె!
ఇదిగో రెండువేల పదము - లిపుడెంచు కొమ్మనిన
చదురు మీద ఉన్న సామికి - సంతోష మింతింతగాదె! వేడు..

అళుకు దీఱి తంజాపురి - నెలకొన్న విజయరాఘవుని
వెలయ మనుజుల వెంబడి - వేగమె పొడగాంచి
చలువ చప్పరమున నుండగ - చక్కగ వేయి పదముల
పలుకరించుకోగానె - బహుమానమిచ్చె నా వేళ! వేడు..

బలవంతుడౌ గోలకొండ - పాదుషా బహుమాన మిచ్చి
తులసి మూర్తితో వాదు - దలచెనా వేళ!
వెలయ మువ్వగోపాలుడు - వెయ్యిన్నేనూఱు పదములు
నలువది దినములలోన - నన్ను గలసి వినుపించెనే! వేడు..