ఉత్తరరామాయణము - హేతి ప్రహేతుల వృత్తాంతము - ఆంధ్రభారతి

హేతి ప్రహేతుల వృత్తాంతము

ఆ.వె.	రామ! యట్టి యక్షరాక్షసకోటిలో నెంచఁ దగిన వీరులిద్ద ఱైరి యెవ్వరన లయాగ్ని హేతిఁ బోలిన హేతి హస్తదీప్ర హేతి యగు ప్రహేతి	196
కం.	ఖేట ప్రతివీరులు మధు కైటభనిభ విక్రమప్రకారులు పటు బా హాటోపపేటు లాది ని శాటులు హేతి ప్రహేతు లద్భుతహేతుల్‌	197
కం.	వారలయందుఁ బ్రహేతి యు దారుఁడు కామాదిరిపువిదారుఁడు శ్రితమం దారుఁడు గుణనందితబృం దారుం డనపేక్షితార్థదారుం డయ్యెన్‌	198
మ.	భయదూరుం డల హేతి తాత పనుపన్‌ భార్యాకుమార స్పృహో భయసంగాత్మకుఁ డౌటఁ గాలభగినిన్‌ భద్రేభకుంభస్తనిన్‌ భయ యన్దానిఁ బరిగ్రహించె దశదిగ్భాగస్ఫురన్మల్లికా భ యశః పాండురమౌక్తిక ప్రతతి పైపై సేస గావింపఁగన్‌	199
కం.	ఆ శాతోదరి విద్యు త్కేశుని సంధ్యాబ్దనికటదీపిత విద్యు త్కేశునిఁ దేజశ్శోచి ష్కేశునిఁ గనె హేతి ప్రీతి చెన్ను వహింపన్‌	200
శా.	విద్యుత్కేశుఁడు తోయదాంబుజము ఠీవిన్‌ దాతృ కీర్త్యున్నతిన్‌ విద్యాభ్యాసి వివేకమున్వలె మహావిజ్ఞాని వైరాగ్య మ ట్లుద్యోగస్థుని కల్మిలీల హఠయోగోద్భాసి యాయుర్గతిన్‌ ఖద్యోతద్యుతి వృద్ధిఁ బొందెఁ పితృరక్షన్‌ జేసి నానాఁటికిన్‌	201
మ.	నవవర్షాగమజృంభితాంబుదము చందానన్‌ మధుస్ఫూర్జితా టవిలీలన్‌ బటు యౌవనస్ఫురదవష్టంభంబునన్‌ పుత్త్రకుం డు విజృంభించిన రీతి హేతి గని సుష్ఠుప్రీతిఁ బ్రాపించి వా ని వయోరూపనిరూఢికిం దగిన కన్నెం గాంక్ష గావింపఁగన్‌	202
సీ.	కమనీయ కమల కోశములతో సమములై - కులుకు గుబ్బమెఱుంగు గుబ్బ లమర నసమాననీలోత్పల సమాన రుచులొంది - కలికి సోయగపు వాల్గన్ను లలర శ్రీనందనస్యందనానందనరథాంగ - పటిమ విస్తృతనితంబము రహింపఁ గంజరాగము మీఱి సంజ గెంజిగి తీరు - వహియించి కెమ్మోని వన్నె మిగుల
గీ.	నిరుల సరులను బెన్నెఱు లిరవు కొనఁగఁ దారకస్ఫూర్తి గన నఖోదారకాంతి సంధ్యవలె మించు సంధ్యాత్మజాలలామఁ బ్రియకుమారున కా హేతి పెండ్లి సేసె	203
శా.	తత్కాలంబునఁ జారుగాత్రియగు సంధ్యాపుత్త్రిఁ బ్రాపించి వి ద్యుత్కేశుండు శచీసమేతుఁ డగు నింద్రున్‌ రోహిణీయుక్తుఁడౌ సత్కాంతున్‌ గిరిజావిలోలుఁ డగు పశ్యత్ఫాలునిన్‌ బోలి య త్యుత్కంఠోత్థ రతిక్రియన్‌ మదనదేవోపాప్తి గావింపగన్‌	204
ఉ.	నీలపయోదయుక్చపల నీటున నాథునిఁ గూడి యొప్పు నా సాలకటంకటాయువతి స్వాతిగతాంబుదవృష్టి శుక్తియున్‌ బోలె నిజేశుతేజమున భూరితరంబుగ నంత గర్భమున్‌ దాలిచి మందరాచల నితంబమునం దురుసాహసంబునన్‌	205
మ.	పరులెవ్వారును గానకుండ నిజగర్భస్థార్భకున్‌ దద్ధరా ధరమధ్యంబున డించి వహ్నిజనితోద్యద్గర్భభారంబు మున్‌ శరమున్‌ జేర్చిన గంగఁ బోల సురతేచ్ఛాలోలయై జీవితే శ్వరుఁ జేరన్‌ జనెఁ బాప మెంచరు గదా చానల్‌ రఘుగ్రామణీ!	206
శా.	ఆ సంధ్యాతనయా విసృష్ట శిశు వాస్యాంతస్ఫురన్ముష్టియై యాసన్న క్షితిభృద్గుహల్‌ బదులు మ్రోయన్‌ కాలజీమూత గ ర్జాసామ్యధ్వని రోదనంబు ఘటియించన్‌ సాగె సింహాదినా నా సత్త్వంబులు తద్ధ్వనిన్‌ బెదరి చెంతన్‌ జేర లే కేఁగఁగన్‌	207
వ.	అప్పుడు	208
సీ.	బలు కెంజడలతోడఁ దెలిగన్నెరుల వన్నె - గల క్రొన్నెల వతంసకంబుతోడ వలుఁద శూలముతోడ నలి నుబ్బు నలమబ్బు - వెలిద్రొబ్బు గరళభృద్గళముతోడ గిబ్బ తత్తడితోడ గిరిరాజు హరిరాజుఁ - గరిరాజు నగు మేని కాంతితోడఁ బునుక కంచముతోడ ననతూపు లన యేపు - గన నోపు దొర బూదిమినుకుతోడఁ
గీ.	బ్రమథతతితోడఁ బార్వతీప్రమదతోడఁ గరిముఖాది కుమారవర్గంబుతోడ శివుఁడు మంథానగిరి తుంగ శృంగవీథిఁ జెలువు మీఱంగ స్వారి వేంచేయునపుడు	209