శ్రీమహాభారతము - ఆశ్రమవాసపర్వము - ప్రథమాశ్వాసము - భీముఁ డర్జునునితో ధృతరాష్ట్రు నుద్యోగంబునకుఁ బ్రతికూలించి చెప్పుట - కవిత్రయ భారతము - కవిత్రయము - నన్నయ - తిక్కన - ఎఱ్ఱన - ఆంధ్రమహాభారతము

భీముఁ డర్జునునితో ధృతరాష్ట్రు నుద్యోగంబునకుఁ బ్రతికూలించి చెప్పుట (సం. 15-17-15)

క.	‘మును చేసినయవి చాలవె? \| విను గాంగేయాది బంధువితతికిఁ దగ నిం కను శ్రాద్ధంబులు వలసిన \| మనము దగమె చేయ దుష్టమతి యతఁ డేలా?	113
క.	మఱచితె యాతఁడు మనలం \| బఱచిన బన్నములు భీష్మ బాహ్లిక ముఖు ల త్తఱి నెటఁ బోయిరి? వారల \| నెఱుఁగమె మన? మట్టి బంధు లేటికి మనకున్‌?	114
వ.	వారి విషయం బైన మేలునకు మాఱాడుట యెగ్గు గా; దాకర్ణింపుము.	115
తే.	కర్ణునకుఁ జేయవలసిన గారవమున \| గొంతి యింకను శ్రాద్ధ మత్యంతవిభవ ముల్లసిల్లంగఁ జేయుఁగా కుచిత నిరతి \| యావిధమునకు మాఱాట సూవె యెగ్గు.’	116
వ.	అని పలికి వెండియు.	117
సీ.	‘పాంచాలి నవమానపఱిచిన తెఱఁగును \| నయ్యింతి వెనుక రా నడవిఁ గలయ ధర్మజుచన్న చందంబును మది గీఱి \| యుండక మఱ పెట్టు లొలసె నీకు నాంబికేయుఁడు తండ్రి యగుట నాఁ డెటఁబోయె \| భీష్ముండు మొదలగు పెద్దవారి బాంధవం బేమయ్యెఁ బార్థ! యీవిదురుఁ డె \| ఱుంగఁడే వారల భంగి?’ యనిన
ఆ.	ధర్మజుండు భీముఁ దగువచనముల న \| దల్చె నరుఁడు మరియుఁ దగఁడె పూజ కాంబికేయుఁ? డిట్టు లనకుము మనకు న \| గ్రజుని పనుపు సేఁత వ్రతము గాదె!’	118
క.	అని భీము నదిమి విదురునిఁ \| గనుఁగొని మా తండ్రి పుణ్య కర్మము లెమ్మైఁ దన బంధులకై చేయఁగ \| మనంబునం దలఁచె నా సమంచితభంగిన్‌.	119
క.	నా యింటి ధనము గైకొని \| చేయఁగలాఁ డమ్మహీశు చిత్తము సంతో షాయత్తంబుగ వేగమ \| పోయి యనఘ! చెప్పు మవ్విభుఁడు ప్రియ మందన్‌.	120
చ.	అన విని మెచ్చి ధర్మసుతుఁ డర్జునునిం గొనియాడి యాదరం బున విదురుం గనుంగొని ‘ప్రభూత విధానములన్‌ నిజేచ్ఛ నా ధనమును నర్జునార్థమును దాఁ గొని శ్రాద్ధము లాచరించు నాఁ డనఘ! కురూద్వహుం డిది మదాత్మకు నిం పని విన్నవింపుమీ!’	121
వ.	అని చెప్పి మఱియు ని ట్లనియె.	122
క.	‘వనవాసాయాసంబుల \| ననయంబును నలఁగి దాని నాత్మ నిడి మరు త్తనయుండు పెక్కులాడెఁ ద \| గని మాటల; దీన రాజుఁ గనలకు మనుమీ!	123
క.	ఇతఁ డేమి యన్ననే మగు? ధృతరాష్ట్రుఁడు మాకుఁ బరమదేవత; విను స మ్మతిఁ దత్ప్రసాదముం బడ \| సితి మేమును దత్కృతాభిషిక్తుల మనఘా!	124
వ.	అని పలికి యప్పుడమిఱేఁడు వికచవదనుం డగుచు.	125
క.	మా తండ్రి నిష్ట విధములఁ \| బైతృక విధు లాచరింపఁ బంపుము రథ్య వ్రాత కనక గో రథములన్‌ \| జేతి కొదవ నర్జునుండు చేర్చుచు వచ్చున్‌.	126
క.	గ్రామములు దేవతలకును \| భూమిసురులకును గురు ప్రభువు ని మ్మను మీ పో మసలితి చెపు మాతని \| కీ మాటలు వలయు పనుల కీవు మెలఁగుమీ!	127
క.	అనినఁ బ్రియ మంది విదురుఁడు \| చని యానృపుతో నజాతశత్రు కడకు నీ పనిచిన పనికిం బోయితి \| వినిపించితిఁ దెఱఁ గతండు విని మోదమునన్‌.	128
క.	నరువలను సూచె నతఁడుం \| బరమ ప్రియ భరితుఁ డయ్యెఁ బార్థివవర! య య్యిరువురుఁ బ్రాణంబులు డాఁ \| పరు నీకును ధనము దాఁచు పని కలిగెడినే?	129
క.	చేయుము విచ్చలవిడి గాం \| గేయ ప్రముఖులు నిరస్త కిల్బిషు లై మో దాయత్త చిత్తులుగ భూ \| నాయక! శ్రాద్ధములు జగమునం బొగ డెసఁగన్‌.	130
చ.	కనకము మేలి రత్నములు గ్రామములన్‌ హయగోవ్రజంబులుం దనియఁగ నిమ్ము సర్వవసుధాసుర కోటులకున్‌ నిజేచ్ఛ నీ తనయులు పుణ్యలోక సుఖధామము లై విలసిల్లునట్లుగా’ ననుటయు నాంబికేయుహృదయంబున మోదమెలర్చె భూవరా!	131
చ.	పదపడి భీముమాట లొకభంగి నెఱుంగఁగఁ జెప్పి, ‘వాఁడు దు ర్మదుఁ, డవి పాటి గావు కురురాజ మహత్తర! పెట్టకుండు నీ హృదయమునందు వాని నని యేర్పడ ధర్మజు పార్థువాక్యముల్‌ విదురుఁడు సెప్పె సంతసము వెల్లిగొనంగ ననేకభంగులన్‌.	132
ఆ.	అట్లు సంతసిల్లి యధిప కార్తిక పౌర్ణ \| మాసి నవ్విభుండు మహిత భూమి దేవకోటి నెల్ల రావించి యంచిత \| శ్రద్ధఁ జేయఁ దొడఁగె శ్రాద్ధవిభులు.	133
సీ.	కనకాది వస్తువుల్‌ గడువేడ్క ధర్మనం \| దనుఁడు పుత్తేర నుదాత్త భంగి బాహ్లికునకు, గంగపట్టికి, సోమద \| త్తునకుఁ దదీయపుత్త్రునకుఁ దొలుత నంచిత శ్రాద్ధంబు లాచరించె సుయోధ \| నాది కుమారుల కందఱకును బేర్వేర క్రియలు నీప్సిత విధంబులఁ దగ \| నొనరించె సింధురాజునకుఁ దక్కుఁ
ఆ.	గలుగు బంధులకును వలయు రాజులకును \| ద్రోణునకును బుద్ధిఁ దోఁచినట్టి యిష్టజనములకు నహీన భవ్యప్రకా \| రములఁ బారలౌకికము లొనర్చి.	134
చ.	అతులితరత్న కాంచన గవాశ్వ విభూషణ వస్త్రకన్యకా క్షితిముఖ వస్తుదానములు గీర్తన కెక్కఁగ నవ్విభుండు సు వ్రతుఁ డయి చేసెఁ బంచదశవాసరముల్‌ నిజదానలౌల్య మ ప్రతిహత వృత్తిఁ జెల్ల విని పాండుసుతాగ్రణి ప్రీతిఁ బొందఁగన్‌.	135
ఆ.	భూమి దాన విధులు భూవర యొక మాత్ర \| నంబికాతనూజుఁ డాచరింప నంతఁ బోక యూళు లగ్రజన్ములకు నీ నతనిఁ బనిచెఁ బాండవాగ్రజుండు.	136