ఉత్తరరామాయణము - శ్రీ సీతాదేవి గర్భంబును దాల్చుట - ఆంధ్రభారతి

శ్రీ సీతాదేవి గర్భంబును దాల్చుట

సీ.	కమ్మల మగఱాల కాంతి గ్రమ్మెనొ నాఁగఁ - దళుకు లేఁజెక్కులు దెలుపు మించెఁ బూసిన కస్తూరిపొలుపు మించెనొ నాఁగ - గలికి చూచుకములు నలుపు మించె రతికాంక్షఁ గృశమౌ తెఱంగుఁ దెల్పెనొ నాఁగఁ - నళినీలవేణి దేహము గృశించె వ్రేలు నీలపుఁదాళి డాలు ముంచెనొ నాఁగఁ - గరియాన నూఁగారు కారుకొనియె
గీ.	బడలిక జనించె నూర్పు సందడి రహించె నడుము గనిపించె మిగుల నెన్నడలు గాంచెఁ జడిమ ప్రాపించెఁ జిట్టుముల్‌ సంభవించె దౌహృదము జానకీదేవి దాల్చునపుడు	178
తే.గీ.	ఇటుల గర్భిణియైన పూర్ణేందుబింబ ముఖి యొకానొకనాఁ డాత్మసఖులు వింత వగలఁ గైసేయ నప్సరోవనితఁబోలి హెచ్చ రహిఁ గాంతుచెంతకు వచ్చుటయును	179
శా.	ఆలోకించి దరస్మితం బెనయ రామాధీశుఁడుప్పొంగి య చ్చూలాలిం దొడమీఁద నుంచికొని మించుంజెక్కు లేఁజెమ్మటల్‌ పాళిం బల్మఱు గోట మీటుచుఁ గుచోపర్యుల్లసత్తారహా రాళుల్‌ చిక్కులు దీర్చుచున్‌ బలికెఁ గాంక్షాకర్ణనాకాంక్షియై	180
మ.	దరహాసద్యుతులెప్పుడున్‌ దొరయుటన్‌ దత్కాంతులింపొందెనో? వరవీటీగత చంద్రఖండరుచి పై వ్యాపించెనో? చంద్రకాం తరమన్‌ గెల్చిన కీర్తి నిల్చెనొ? యనన్‌ దళ్కొందె నీ చెక్కులం దరుణీ! పాండిమ తారహారముకురోదారప్రభల్‌ మీఱఁగన్‌	181
మ.	స్తనశృంగారరసంబు చూచుకసముద్యన్నీలిమం గానిపిం చి నవీనంబగు పూఁతకస్తురి రుచిం జెల్వొంది పైనిండి జా ఱిన తద్ధారయొ నాఁగఁ దార్కొని మిటారించెన్‌ భవద్రోమ రా జి నిరూఢాంగకదీప్తిఁ దోఁచు జడయౌ సిద్ధం బనన్‌ జూపరుల్‌	182
కం.	గడుసువలిగబ్బి గుబ్బల బెడిదపు భారమున జడిసి పేదతనముతో వడఁకెడి నీ నడుమున కి య్యెడ గర్భసమృద్ధి యభయ మిచ్చెఁగదే చెలీ!	183
కం.	సోముని గెల్చిన నీ నగు మోము ధరాదేవి మెచ్చి ముద్దిడుకొనెనో? కామిని! యది కాదేనియు నీ మొగమున మంటితావి యేమిటి కొదవెన్‌?	184
చం.	జడగతిఁ బాదముల్‌ గనిన చాడ్పున వాలుమిటారి చూపులన్‌ బడలిక మబ్బుపైకొనిన బాగున మోమునఁ బాండురద్యుతుల్‌ సుడిసినలీల మంటి చవిచొక్కు రసజ్ఞ వహించినట్టు నీ యెడఁద మఱేమియైన యొక యిచ్చ జనించినఁ దెల్పవే చెలీ!	185
కం.	పత్నికులమలర నంత ర్వత్నియయిన చిన్నె లెఱిఁగి వాంఛిత మేమో నూత్నముగ నడిగి మగఁడది యత్నంబునఁ జేయవలయు నతివరొ! యనుచున్‌	186
ఉ.	మాటలఁ దాటకాంతకుఁడు మాటికిఁదేనియ లొల్క వేఁడినన్‌ బాటలగంధి సిగ్గు ప్రతిభాషితచాతురి నడ్డగింపఁగాఁ గాటపుఁగాంక్ష యన్తరువుకత్తె మదిం ద్వరసేయ నల్లనన్‌ మీటిన మ్రోయువీణెవలె మించునెలుంగున భర్తతోననున్‌	187