ఉత్తరరామాయణము - హనుమంతుఁడు ఫలభ్రాంతి రవిరాహుల మ్రింగనుద్యోగించుట - ఆంధ్రభారతి

హనుమంతుఁడు ఫలభ్రాంతి రవిరాహుల మ్రింగనుద్యోగించుట

ఉ.	అంతటిలోన నీతఁ డుదయాద్రిపయిం బొడతెంచు పద్మినీ కాంతు జపాప్రసూన రుచికాంతుఁ గనుంగొని పండటంచు వి భ్రాంతి వహించి యాఁకటి తొరన్‌ రవిపై కెగసెన్‌ సమీరనా గాంతక బాణవేగ పరిహాసి సమిద్ధమహాజవోన్నతిన్‌	99
తే.గీ.	ఎగసి చనుచున్న యీతని తెగువఁ జూచి గగనచరులైన గంధర్వగరుడయక్ష సిద్ధ సాధ్యులు నివ్వెఱఁజెంది యమ్మ హామహుం డెవఁడో యను నంతలోన	100
తే.గీ.	భానుకడకేఁగు నప్పిన్నవాని మేని కెండ దాఁకకయుండ నుద్దండవృత్తి నుడిగి మిన్నేటి తమ్మి పుప్పొడి దుమార మెనసి వలిగాడ్పు వెనువెంటఁ జనుచునుండె	101
సీ.	పదతాడనములచే బ్రద్ధలై పాథోధి - పాళికల్‌ దూలికాభంగిఁ జెదర నూరుఘట్టనలచే నూర్ధ్వగంధర్వాది - నగరముల్‌ ఛిన్నభిన్నములుగాఁగ బాహువేగంబుచేఁ బఱతెంచు వైమాని - కుల విమానంబులు కూలఁబడఁగ వాల విక్షేపంబుచే లాజలను బోలి - తూలి నక్షత్రముల్‌ నేల రాల
గీ.	దేహకాంతులు చక్కఁగాఁదేఱి చూడ లేక ఖచరులు బెగడి చీకాకుఁజెంద నేదియును జూడ కీ జగద్ధిత చరిత్రుఁ డట్టె చని బాలభానునిఁబట్టె నపుడు	102
సీ.	ఒద్ద సేవలు సేయుచున్న ఛాయాదేవి - భీతిల్లి కరములఁ బిసికికొనఁగ భయనివారణమంత్ర పరతంత్రులై వాల - ఖిల్యాది మౌనులు క్రేవ నొదుగ జడుపుతో కైదువుల్‌ విడిచి మాఠరముఖ్య - పారిపార్శ్వికు లెల్లఁ బాఱిపోవ హతశేష మందేహు లట్లు గావలయుఁ బో - యీ భానున కటంచు నిచ్చలనర
గీ.	నలరు నా పద్మహితుఁబట్టి యాననమునఁ బెట్టుకొను బిట్టు వేఁడిగా నట్టె విడుచు నడుచుఁజేతులు సెగయైన యది యటంచుఁ గినిసి యాఁకటి కడిమి నియ్యనిలసుతుఁడు	103
చం.	జగదుపకారి యీ ప్లవగచంద్రుఁ డటంచుఁ దలంచి భానుఁడున్‌ దగదగమండుచుండు కిరణంబుల వేఁడిమిఁ జూపఁడయ్యె రెం డు గడియ లేఁగ నంతఁదపనున్‌ గ్రహియింపఁగ నాఁడు పర్వమౌ టఁ గదియవచ్చె రాహు వచటం గలవా రరుదంది చూడఁగన్‌	104
ఉ.	ఆ గ్రహరాజుఁ బట్టిన మహామహు నీతనిఁ జూచి రాహు వ త్యాగ్రహ వృత్తితోఁ గహకహార్భటిఁ జేయుచు డాయ నంత సూ ర్యగ్రహణంబు మాని యవురా! యిది నల్లనిపండు వచ్చె నం చుగ్రలయోగ్ర విగ్రహత నొక్కటి నాతని మ్రింగఁ బోవఁగన్‌	105
చం.	జడిసి విధుంతుదుం డితనిఁ జక్కఁ గనుంగొనలేక యయ్యెడన్‌ వడిఁ బరువెత్తి యత్తెఱఁగు వాసవుతో నెఱిఁగింప నాతఁడున్‌ గడు వెఱఁగంది, నీ క్రమముఁ గైకొను నంతటి వీరుఁ డెవ్వఁ డం చడుగుచు నాల్గు కొమ్ముల మహాకరి నెక్కి శతారహస్తుఁడై	106
చం.	నలుగడలన్‌ వియచ్చరగణంబులు గొల్వఁగ నేఁగుదెంచి, య జ్జలరుహబంధుచెంతఁ బ్రతిచండకరుండన దుర్నిరీక్ష్య కాం తులఁ దులకించు నీ ఘను గనుంగొని, యెవ్వఁడొ వీఁ డటంచుఁ పే రలుక వహించి, మత్తకరి నట్టె పయిం గవియించి, యార్చుడున్‌	107
కం.	పాండురుచి మించినది యీ పండు హరింతు నని తీవ్రపడి కడుఁ బసి పా పం డగుటఁ దెలియ కీతఁడు చండాంశుని విడిచి యల గజముపై కుఱికెన్‌	108
వ.	ఇవ్విధంబున	109
తే.గీ.	కేసరికిశోర ముద్భట క్రీడ మీఁది కుఱికినంత భయభ్రాంతు లొంది చండ పవన హతిఁ దూలు శారదాభ్రంబు లీల నభ్రము విభుండు దెరల జంభారి గెరలి	110
ఉ.	భద్రగజంబుపై నుఱుకు పావని నొండొకటన్‌ జయింప లే కద్రుల్‌ వ్రక్కలించు కులిశాయుధ ముద్ధతిఁ బూని వైవ న య్యద్రిచరుండు వామహనువందున నొచ్చిన మూర్ఛఁజెంది పూ ర్వాద్రిపయింబడెన్‌ గహకహార్భటిఁ జేయుచు రాహు వుబ్బఁగన్‌	111