ఉత్తరరామాయణము - హనుమంతుడు సూర్యునొద్ద వేదశాస్త్రాదులు చదువుట - ఆంధ్రభారతి

హనుమంతుడు సూర్యునొద్ద వేదశాస్త్రాదులు చదువుట

శా.	భానుండద్భుతమందె నంత నిజరూపం బూని యీ వానరుం డా నీరేరుహబంధు తేరి కెదురై యాకాశమార్గంబునన్‌ దా నెంతే వడిఁబోవుచున్‌ శ్రుతులు శాస్త్రంబుల్‌ పఠించెన్‌ బరి జ్ఞానగ్రాహకతావిశేషములకున్‌ జండాంశుఁ డుప్పొంగఁగన్‌	140
తే.గీ.	కుడిచి చల్లని నీడలఁ గూరుచుండి గురువు చెప్పినఁ జదువరీ ధర వడుగులు నిరశనుండయి పఱచుచు నింగిఁ గఱకు టెండకు సహించి చదివె నీతండు ఘనుఁడు!	141
కం.	ఈ శాఖామృగశేఖరు తో శతధృతి కవి బృహస్పతులు మృదుభాషా కౌశలి శ్రుతిముఖ విద్యా వైశారద్యమున సాటివత్తురె తలఁపన్‌	142
సీ.	వైరాగ్యమహిమకీ వడుగు నివాసంబు - వినయంబునకు నీతఁ డునికిపట్టు శమదమోన్నతులకీ చతురుఁ డాధారంబు - దాక్షిణ్యమునకు నీతండు చోటు సౌశీల్యమున కీ ప్రశాంతిశాలి బిడారు - పరహితక్రియ కీ ప్రసన్నుఁ డిక్క విక్రమస్ఫురణ కీ వీరవర్యుఁడు ఠావు - గాంభీర్యగరిమ కీ ఘనుఁడు ప్రాపు
గీ.	బ్రహ్మ విద్యకు నిమ్మేటి పట్టుఁగొమ్మ ఘనతపోధనమునకు నీయన నిధాన మతుల ధైర్యంబునకు నీ మహాత్ముఁ డిమ్ము రామ! నీ భక్తి కీ పుణ్యరాశి నెలవు	143
సీ.	గుఱిమీఱ రోదసీకుహర మొక్కట ముంప - నుప్పొంగు బ్రళయ పయోధికంటె జగము లన్నియు నొక్కసారె భస్మము సేయ - నడరెడు కల్పక్షయాగ్నికంటె బహు పర్వతారణ్య పటలిఁ జూర్ణము సేయఁ - గడగు సంవర్తాశుగంబుకంటె బ్రహ్మాండభాండంబుఁ బట్టి బ్రద్దలు సేయఁ - దివిరెడు విలయభైరవునికంటె
గీ.	నధికగాంభీర్య మతులితం బగు ప్రతాప మనవధికవేగ మద్భుతంబైన రౌద్ర మియ్యనిల పుత్రునకె కల దితని మ్రోల వాలి గీలియు నిలుతురే? వసుమతీశ!	144
కం.	ఇనసుతుకడ నితఁ డున్నాఁ డని యెఱిఁగియె వాలి కొంత యళుకుచునుండున్‌ దనకేమి యితఁడు గలఁడని యినసుతుఁడును వెఱవకుండు నింద్రసుతునకున్‌	145
తే.గీ.	అని యగస్త్యమహాముని హనుమ మహిమ లద్భుతంబుగఁ దెల్పిన నాలకించి సభ్యు లనిలజుఁ బదివేల చందములను బ్రస్తుతింపఁగ శ్రీరామభద్రుఁ డలరి	146
ఉ.	ఆ విపులప్రభావ నిధి కంజలి సేసి, మునీంద్ర! వింటి నీ చే వివిధేతిహాసములు శ్రీహనుమత్కథ లాలకించితిన్‌, దైవతనాథుఁడన్‌ రవియుఁ దండ్రి యనన్‌ వినినాఁడ, వాలిసు గ్రీవుల జన్మ మెట్టు లెఱిఁగింపఁగదే యన మౌని యిట్లనున్‌	147